Skohe Bida Eterno

NUNKA promé hende no tabatin asina tantu oportunidat di skohe. Tuma por ehèmpel, e pañanan ku nos ta bisti, e kuminda ku nos ta kome, i kaminda nos ta traha i biba. Hopi bes esakinan ta kosnan ku nos mes ta skohe. Na hopi parti di mundu ta normal tambe pa un persona mes skohe su kasá. Sin embargo, Beibel ta duna nos oportunidat pa skohe algu ku ta surpasá tur otro kos ku nos por skohe. I ta tur hende tin e oportunidat aki.

Beibel ta bisa: “Esun ku para firme den hustisia lo optené bida, i esun ku sigui maldat lo kousa su mes morto.” (Proverbionan 11:19) I Hesukristu a deklará: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”—Juan 17:3.

Sí, nos Kreadó ta duna nos e oportunidat pa skohe un estilo di bida ku por hiba na bida eterno! Kiko nos tin ku hasi pa haña bida eterno?

Segun Beibel, “den e kaminda di hustisia tin bida.” (Proverbionan 12:28) Nos por ta entre e hustunan ku ta kana riba e kaminda ku ta hiba na bida eterno. Kon asina? Dor di hasi sigur ku nos bida ta na armonia ku Dios su boluntat i su mandamentunan. (Mateo 7:13, 14) P’esei, laga nos tur skohe bon i risibí e don di grasia, òf e regalo, di bida eterno ku Dios ta duna.—Romanonan 6:23.