Bo Ta Keda Kordialmente Invitá

E Último Sena, ku e Señor Hesukristu a instituí un 2.000 aña pasá, ta mas ku djis un evenementu históriko. For di dia ku a kuminsá ten’é e tabatin un efekto profundo riba hende. Konmoví pa loke nan a lesa den e relatonan di Evangelio ku a tuma lugá e anochi ei, hopi hende a hasi esfuerso pa konmemorá e Sena di Señor den vários manera.

E interes den e Último Sena ta di komprondé, ya ku Hesukristu mes a duna òrdu pa su siguidónan selebrá e evenementu aki i pa hasié ku regularidat. El a bisa nan spesífikamente: “Sigui hasi esaki na mi rekuerdo.”—Lukas 22:19, NW; 1 Korintionan 11:23-25.

Klaru ku pa bo realmente saka benefisio di e selebrashon, bo mester komprondé kiko e ta nifiká presis, manera ta ser spliká den e Palabra di Dios, Beibel. Ademas, ta importante pa sa kiko Beibel ta bisa tokante e dia, ora i manera ku mester selebrá e evenementu.

Testigunan di Yehova rònt mundu, siguiendo e òrdu di Hesus, lo reuní huntu riba e anochi di djarason 16 di aprel 2003, pa konmemorá e morto di Hesus. Ta un okashon pa nan saminá e Skritura i renobá nan fe den Señor Hesukristu i nan amor pa esun ku a bisa: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) Bo ta keda kordialmente invitá pa reuní huntu ku nan e anochi ei pa asina bo tambe por fortalesé bo fe i amor pa Hesukristu i pa e Tata selestial, Yehova Dios.