“Bo Tin Rason, Bida Ta Dushi!”

LO BO kier sa kiko ta e berdadero nifikashon di bida? Magdalena, un Testigu di Yehova di diesocho aña ku ta biba na Szczecin, Polonia, a yuda Katarzyna, un mucha muhé di su skol sekundario haña sa esei. Katarzyna semper a bisa ku e ta un ateista pero ora Magdalena a papia kuné tokante Beibel, el a mustra interes sinsero.

Ounke Katarzyna tabata gusta loke Magdalena tabata splik’é di Beibel, no ta tur kos e por a aseptá. Un biaha ku Katarzyna tabata papia ku Magdalena tokante berdadero amigu, Katarzyna a bis’é: “Abo tin Beibel; bo konosé ki prinsipionan bo tin ku sigui i unda bo por haña amigu. Pero kiko di esnan ku por lo ménos pa awor aki no por aseptá e prinsipionan ei?”

Tur kos a bin kambia na momentu ku Katarzyna a hasi un biahe pa Lònden, Inglatera. Ayanan el a bishitá e sukursal di Testigunan di Yehova i a keda impreshoná p’e bondat ku nan a mustra na dje. Gestonan simpel manera ora otronan tabata habri porta p’e i mustra berdadero interes den dje ora e tabata papia, a konmov’é.

Ora e aña eskolar nobo a kuminsá na sèptèmber 2001, Katarzyna a disidí di aseptá un studio regular di Beibel. Mas i mas el a bin mira e balor di prinsipionan bíbliko i el a kuminsá apliká nan den su bida di tur dia. Resientemente el a konfia Magdalena: “Mi ta sinti komo si fuera mi ta kuminsando un bida nobo.” Tambe el a manda un mensahe kòrtiku p’e via telefòn selular: “Masha danki pa nos studio awe! Bo tin rason, bida ta dushi! Ta algu maravioso pa sa ken nos tin ku gradisí pa esei.”