“Pordoná Otro”

BO TA kere ku Dios ta pordoná bo pikánan? Ta parse ku mayoria adulto na Merka ta kere esei. Dr. Loren Toussaint, e persona prinsipalmente responsabel pa un estudio ku nan a hasi na e Universidat pa Investigashon Sosial di Instituto di Michigan, ta informá ku di e 1.423 merikanonan ku a partisipá n’e enkuesta, rònt di 80 porshento di e adultonan riba 45 aña di edat a bisa ku Dios a pordoná nan pa nan pikánan.

Sin embargo, ta interesante pa nota ku ta solamente 57 porshento di esnan ku a partisipá n’e enkuesta a bisa ku nan ta pordoná otro hende. E datonan ei ta hasi nos kòrda e palabranan di Hesus den e Sermon Riba Seru: “Pasobra si boso pordoná hende nan transgreshonnan, boso Tata selestial tambe lo pordoná boso. Ma si boso no pordoná hende, boso Tata tampoko lo no pordoná boso transgreshonnan.” (Mateo 6:14, 15) Sí, pa Dios pordoná nos nos pikánan, nos tambe mester ta kla pa pordoná otro hende.

Apòstel Pablo a rekòrdá e kristiannan di Kolósas e prinsipio aki. El a urgi nan: “Boso soportá otro i pordoná otro, si un di boso tin un keho kontra un otro; meskos ku Señor a pordoná boso, asina boso tambe mester hasi.” (Kolosensenan 3:13) Ta bèrdat ku esaki no ta semper fásil. Por ehèmpel, ora un hende papia kosnan malu i ofensivo di bo, lo por ta difísil pa bo pordoná e persona ei.

Sin embargo, ora bo ta pordoná otronan bo por haña hopi benefisio. Dr. David R. Williams, un sosiólogo, a bisa relashoná ku su investigashon: “Nos a ripará ku tin un relashon fuerte entre pordon i e salú mental di merikanonan di edat medio i mas bieu.” Esaki ta na armonia ku e palabranan di e rei sabí, Sálomon, kende a skirbi 3.000 aña pasá: “Un kurason trankil ta bida pa e kurpa.” (Proverbionan 14:30) Siendo ku e inklinashon pa pordoná ta promové un bon relashon ku Dios i ku nos próhimo, nos tin motibu válido pa ser dispuesto pa pordoná otro hende di kurason.—Mateo 18:35.