Nunka Muchu Bieu pa Siña

KSENIYA a nase na aña 1897. E tabatin 3 yu muhé, un yu hòmber, 15 nietu i 25 bisañetu. Henter su bida el a hasi loke su mayornan a siñ’é hasi. El a bini Moskú komo refugiado for di e Repúblika Abkhaz, ubiká entre laman Pretu i e serunan di Caucasus. Tòg e tabata hopi satisfecho ku su bida, foral ku loke el a yama su religion heredá.

Na 1993, Kseniya su yu muhé Meri a bira Testigu di Yehova. Meri a kuminsá papia ku Kseniya tokante Yehova Dios i Beibel, pero e no kier a tende. Kseniya tabata blo bisa su yu muhé: “Mi ta muchu bieu pa mi siña algu nobo.”

Tòg su yu muhé Meri, i tambe Londa (kasá di su nietu) i Nana ku Zaza (su bisañetunan), kendenan tur a bira Testigu di Yehova, a sigui papia kuné tokante Beibel. Un anochi na 1999, nan a lesa un teksto di Beibel pa Kseniya ku a toka su kurason. E teksto tabatin e palabranan konmovedor ku Hesus a bisa su fiel apòstelnan ora el a instituí e Sena di Señor. (Lukas 22:19, 20) E anochi ei, na edat di 102 aña, Kseniya a disidí di kuminsá studia Beibel.

Kseniya a bisa: “Despues di a biba 102 aña, por fin mi a komprendé e nifikashon di bida. Awor mi ta realisá ku no tin nada mihó ku sirbi Yehova, nos Dios maravioso i amoroso. Ainda mi ta salú i na mi tinu. Mi por lesa sin brel i ta asosiá aktivamente ku mi famia.”

Dia 5 di novèmber 2000, Kseniya a batisá. E ta bisa: “Awor mi ta duna mi bida na Yehova pa sirbié ku amor. Mi ta laga revista i tratado sintá na e parada di bùs banda di mi kas. Hopi bes famianan ta bin bishitá mi, i felismente mi ta kompartí e bèrdat tokante Yehova ku nan.”

Ku anhelo Kseniya ta spera riba e dia ku ‘su karni lo bira mas suave ku esun di mucha, i ku lo e bolbe na e dianan di vigor di su hubentut.’ (Job 33:25) Si un señora di shen aña no ta haña ku e ta muchu bieu pa siña for di Beibel kiko ta e nifikashon di bida, ke hubo di abo?