Kuantu Balor un Konsenshi Limpi Tin?

“HUES A Ordená Gobièrnu pa Tuma R$ 20.000.” E titular straño aki a aparesé resientemente den e korant di Brazil Correio do Povo. E artíkulo a relatá e historia di Luiz Alvo de Araújo, un postbode lokal ku a bende un pida tereno ku gobièrnu. Despues ku Luiz a pasa e akta di traspaso dje tereno, pa su sorpresa, el a deskubrí ku nan a pagu’é 20.000 real brazilero (mas o ménos 14.400 florin) mas ku e preis kumbiní!

No tabata fásil pa debolbé e plaka di mas. Despues di vários bishita sin resultado na departamentonan di gobièrnu, Luiz a ser konsehá pa buska un abogado i hiba e kaso korte. E hues ku a ordená gobièrnu pa tuma e sèn, i paga e gastunan dje kaso, a remarká: “Aparentemente un hende a kometé un fayo, i debí na burokrasia, niun hende no tabata sa kon pa resolvé e asuntu. Ta promé bes ku mi ta haña mi ku un kaso asina.”

Luiz, kende ta un Testigu di Yehova, ta spliká: “Mi konsenshi bíblikamente entrená lo no a laga mi keda ku loke legalmente no tabata di mi. Mi mester a debolbé e sèn.”

Hopi hende lo haña e aktitut di Luiz straño òf asta inkomprendibel. Pero e Palabra di Dios ta mustra ku kristiannan berdadero ta duna hopi balor na un konsenshi limpi den nan trato ku outoridat. (Romanonan 13:5) Testigunan di Yehova ta determiná pa mantené un ‘bon konsenshi, i komportá nan mes den tur kos na un manera onorabel.’—Hebreonan 13:18.