Informe di Proclamadónan di Reino

Alcansando Esnan Difícil pa Alcansá

TESTIGONAN DI JEHOVA ta haci esfuerso pa duna tur hende cu nan por topa, e mensahe di Reino. Tin bes nan tin cu haci esfuerso extraordinario pa alcansá esnan cu rara bes ta na cas. (Marco 13:10) Relacioná cu esaki, un minister pionero special den un pais na Sur América ta conta e siguiente experencia.

“Un dia mi a haña sa cu e gobernadó di estado lo ta di bishita n’e teritorio caminda ami cu mi casá ta asigná. Ya cu obviamente e tabata un di e personanan cu masha poco ta na cas, mi a skirbié un carta i huntu cu e carta mi a pone vários publicacion bíblico. Entre nan tabatin e foyeto Kico Dios Ta Rekerí di Nos? i e bukinan Hende en Busca di Dios i Conocimentu cu Ta Hiba na Bida Eterno. Mi carta a splica e propósito di cada un dje publicacionnan aki.

Dor cu mi tabata masha interesá pa sa con e ta reaccioná riba e literatura, mi a pidi un reunion cuné. Algun siman despues nan a concedé mi un reunion, i mi a bai cu un ehemplar di e video Testigonan di Jehova—E Organisacion Tras dje Nomber. E reunion a dura mas o ménos dos ora. Despues cu ami i e gobernadó a wak e video huntu, mi a puntr’é kico e ta pensa di dje. El a contestá: ‘No tin un organisacion manera esun di boso riba tera. Mare mi tabatin hende manera boso cu por a yuda mi terminá mi proyectonan di gobernacion!’ Anto el a puntra mi si mi a yega di bai e sede di nos organisacion. Mi a bis’é cu aunke mi tabatin e meta ei for di tempu cu mi tabatin 14 aña, nunca mi no tabatin e oportunidad di bishitá nos sede mundial na Brooklyn, New York. Esei tabata un dje metanan cu ta difícil pa alcansá. Pa un ratu el a keda wak mi duru den mi cara. Despues el a bisa cu e kier duna mi e oportunidad ei. El a percurá pa nos permitnan legal i a regalá nos e pasashinan di avion!

Awor e gobernadó ta ricibí e revistanan Toren di Vigilancia i Spierta! regularmente. Nos ta spera cu pronto nos lo por cuminsá un studio di Bijbel cuné.”