Religion Lo Trece Pas Mundial?

DI 28 pa 31 di augustus 2000, mas cu 500 representante for di 73 pais a bini huntu na New York City. Nan a reuní na Nacionnan Uní pa “E Cumbre Mundial di Pas di Milenio di Lidernan Religioso i Spiritual.” E lidernan a representá un multitud di fe. Hopi di nan tabata bistí cu tulban na cabes, cu pañanan hanchu largu color oraño, pluma na cabes of mantelnan largu pretu. Entre e fenan aki tabatin bahai, budismo, hinduismo, hudaismo, islam, jainismo, sikh, sinto, taoismo, zoroastrismo i religionnan di cristiandad.

E promé dos dianan dje conferencia di cuater dia, e delegadonan a reuní na Nacionnan Uní (NU). Sin embargo, e conferencia no tabata organisá ni patrociná dor di Nacionnan Uní, sino dor di vários fundacion. No obstante, tantu e lidernan religioso como esnan di NU a papia dje importancia di traha huntu pa trece un fin na pobresa, racismo, problemanan di medio ambiente, guera i armanan di destruccion masal.

E delegadonan a firma un documento titulá “Compromiso pa Pas Mundial.” Aunke e documento a reconocé cu tin biaha violencia i guera ta “ser cometé den nomber di religion,” e ta declará cu esnan cu ta firm’é lo “colaborá cu Nacionnan Uní . . . pa alcansá pas.” Sin embargo, no tabatin resolucionnan specífico cu ta indicá con lo por haci esaki.

Riba e di dos dia, Bawa Jain, secretario general dje cumbre, a concluí su palabranan di introduccion splicando cu algun aña promé el a ripará un cierto cuadro na Nacionnan Uní. E cuadro tabata mustra un homber mas haltu cu e edificio di Secretaria di Nacionnan Uní. E homber tabata bati riba e edificio como si fuera e tabata un porta. Bou dje pintura tabatin e palabranan: “Prins di Pas.” Sr. Jain a bisa: “[E cuadro] tabatin un efecto profundo riba mi for di momento cu mi a wak e. Mi a puntra diferente hende ta kico [e] tabata nificá. Mi kier sa awe mi tin e contesta. E echo cu boso tur—lidernan spiritual i religioso di mundu—ta reuní aki, ta demostrá mi cu [esaki] ta e prins di pas batiendo na porta di Nacionnan Uní.”

Bijbel ta presentá un punto di bista distinto. E ta mustra cu e Prins di Pas ta Jesucristo. É lo trece pas mundial, no mediante e esfuersonan di lidernan político ni religioso dje mundu aki, sino mediante e Reino di Dios. Ta e Reino aki—Dios su gobiernu celestial—ta esun cu lo tin éxito den uni humanidad obediente i laga Dios su boluntad sosodé riba tera.—Isaías 9:6; Mateo 6:9, 10.