Operacion sin Sanger—“Un Tendencia Médico Importante”

BOU di e titular “Operacion ‘sin Sanger,’” e revista Maclean’s a informá cu dokternan rond Cánada a bin ta “desaroyá técnicanan nobo cu, durante e último cincu añanan, a combertí e asina yamá operacion sin sanger den un tendencia médico importante.” Brian Muirhead, un anestesiólogo na e Centro di Ciencia di Salú di Winnipeg, ta un dje dokternan ei. Kico a impulsá su búskeda di tratamentu alternativo cu no ta usa sanger?

Na 1986, dr. Muirhead a aceptá e reto di operá un homber di 70 aña cu tabatin un úlcera ta sangra, i cu debí na su creencianan basá riba Bijbel como un Testigo di Jehova, a pidi pa dun’é un tratamentu cu no a rekerí transfusion di sanger. (Echonan 15:28, 29) Dr. Muirhead “a recurí na un método poco usá di pomp un líkido salu den e pashent pa tene su preshon haltu,” segun Maclean’s. “E procedura tabata un éxito, i a reforsá Muirhead su creciente conviccion cu ‘nos tabata duna demasiado transfusion di sanger. Mi a pensa cu tabata tempu pa cuminsá busca alternativa.’”

E búskeda pa operacion sin sanger a ser “stimulá tantu dor di preocupacion pa e futuro suministro di sanger di donante, como dor dje miedu cu hopi pashent tin di haña un vírus for di transfusion.” Danki na e investigacion hací dor di dokternan inventivo, no ta Testigonan di Jehova so a beneficiá sino hopi otro hende mas. “Fuera di eliminá den hopi caso e necesidad di transfusion, operacion sin sanger ta reducí e riesgo—maske con chikitu—di ser infectá cu sanger contaminá,” Maclean’s ta bisa. Pero asta sanger “limpi” por ta un riesgo di infeccion dor cu temporalmente e ta suprimí e pashent su sistema inmunológico.

Kico tin tras dje conviccion firme di Testigonan di Jehova relacioná cu tratamentu alternativo sin sanger? Kisas lo bo ta interesá pa lesa e foyeto Con sanger por salba bo bida? Testigonan di Jehova lo compartié gustosamente cu bo.