“Un Curacion pa Bo Lombrishi”

EXPERTONAN ta kere cu un gran cantidad di malesa di humanidad ta ser causá dor di tensionnan emocional manera miedu, tristesa, envidia, rencor, odio i sintimentu di culpa. En bista di esaki, esta un consuelo ta e declaracion di Bijbel cu e ‘temor di Jehova’ ta “un curacion pa bo lombrishi i un refrescamentu pa bo wesunan”!—Proverbionan 3:7, 8.

E wesunan ta forma e structura cu ta sostené e curpa. Pues, Bijbel ta usa e palabra “wesunan” figurativamente, pa representá henter e persona, foral ora e ta ser influenciá dor di sintimentunan profundo i emocion. Pero con e temor di Jehova ta “un curacion pa bo lombrishi”?

Eruditonan di Bijbel ta varia di opinion relacioná cu e mencion di “lombrishi” den e pasashi aki. Un comentarista ta bisa cu debí cu “lombrishi” ta na “e region central dje curpa,” kisas e ta representá tur e órganonan vital. Un otro erudito ta sugerí cu e palabra “lombrishi” kisas ta nificá e cabuya di lombrishi, manera e ta ser usá na Ezekiel 16:4. Si ta asina, Proverbionan 3:8 kisas ta enfatisá cu nos mester dependé completamente di Dios, casi mescos cu un feto indefenso ta dependé completamente di su mama pa ricibí nutricion. Un otro idea ainda ta cu “lombrishi” kisas ta referí aki na músculo i pees dje curpa. Den e contexto di e versículo aki, podisé ta haci un contraste entre e músculo i peesnan aki cu e “wesunan,” cu ta e componentenan mas sólido dje curpa.

Sea cual sea ta e nificacion specífico, un cos ta sigur: Desplegá un temor respetuoso pa Jehova ta e curso di sabiduria. Adaptando nos mes na e normanan di Dios, por contribuí na nos bienestar físico awor. Mas cu esei, e por trece Jehova su aprobacion riba nos, loke lo hiba na bida eterno den salú perfecto—físicamente i emocionalmente—den su binidero mundu nobo.—Isaías 33:24; Revelacion 21:4; 22:2.

[Rekonosementu pa Potrèt na página 32]

Dr. G. Moscoso/SPL/Photo Researchers