Pas Mundial—Con?

PAS Mundial ta na horizonte? Hopi hende cu a yega di pensa esei ta sképtico awor. Segun un informe cu ta trata desafionan pa nos futuro, publicá den Daily Mail & Guardian, na Sur África, “pronósticonan di un ordu nobo internacional cu hende a haci solamente 10 aña pasá, ta parce demasiado optimista awor.”

E autornan ta refleccioná riba e spiritu yen di speransa cu a prevalecé meramente un década pasá. E Guera Friu a caba di terminá, i no tabatin lucha entre superpodernan mas. N’e tempu cu a parce e principio di un era nobo, hopi hende a spera cu humanidad lo a cuminsá haci progreso significativo den trata cu pobresa, malesa i problemanan di medio ambiente. “Awor e pronósticonan ei ta parce utopia sin speransa,” segun e informe. “A surgi conflictonan nobo den áreanan cu apénas nos tabata sa di nan; pobresa mundial ta sigui aumentá. Tin dos pais nobo cu tin arma nuclear. E reputacion di Nacionnan Uní a bai hopi atras debí n’e manera inadecuá cu e ta reaccioná n’e secuencia di crísisnan humanitario. E spiritu cu ta prevalecé ta cambiando di utopia pa anti-utopia.”

Studiantenan di Bijbel ta realisá cu esfuerso di hende, sin importá con noble nan ta, nunca no por logra éxito completo. Di con no? Pasobra manera Bijbel ta bisa, “henter e mundu ta drumí den poder dje malbado.” (1 Juan 5:19) Tanten cu e mundu ta bou di control di Satanas, e no por bira e Paradijs pa cua Dios a cre’é.

Na mésun tempu, tin un base pa optimismo. Jehova Dios ta primintí di trece pas mundial, no dor di lapi e sistema di cosnan aki, sino dor di trece “un tera nobo” den cua “husticia lo tin cu biba.” (2 Pedro 3:13) Sí, mediante e Reino di Dios, nos globo lo ser transformá den un hogar pacífico i felis caminda bida i trabou lo ta un goso constant pa henter humanidad obediente. Ademas, Dios ta primintí di “seca tur lágrima di nan wowo, i [cu] lo no tin morto mas, ni lo no tin lamento ni sclamacion ni dolor mas.” E promesanan aki no ta basá riba pronóstico insigur di hende. Mas bien, nan ta basá riba e Palabra infalibel di e Creador, cu no por gaña.—Revelacion 21:4; Tito 1:2.