Ora Keda Ketu Kier Men Consentí

E BUKI Betrayal—German Churches and the Holocaust (Traicion—Iglesianan Aleman i e Holocausto) ta trata e papel di religion den nazismo di un manera franco. E buki ta afirmá cu “apoyá e régimen tabata algu comun entre cristiannan, i e gran mayoria no a lanta ningun obhecion contra e persecucion di hudiu. Den e caso aki, keda ketu ta papia bon cla.”

Kico a atraé hende cu a profesá di ta cristian, na nazismo. E buki ta splica cu hopi a ser seducí dor di Hitler su “método di dominá e sociedad aleman cu ley-i-órden.” E buki ta bisa: “E [Hitler] tabata contra pornografia, prostitucion, aborto, homosexualidad i e ‘cosnan repugnante’ den arte moderno, i el a duna medaya di brons, plata i oro na muhernan cu a producí cuater, seis i ocho yu, animando nan asina pa keda den nan papel tradicional na cas. E apelacion aki na balornan tradicional combiná cu e nacionalismo militar cu Hitler a ofrecé como contesta riba e humiyacion nacional dje Tratado di Versailles, a haci Socialismo Nacional un opcion atractivo pa hopi, asta pa mayoria, cristian na Alemania.”

Un grupo a para na contraste skerpi. Betrayal ta remarcá cu “Testigonan di Jehova a nenga di participá den violencia of uso di forsa militar.” Inevitablemente esaki a hiba na atake cruel contra e grupo chikitu aki, i nan a cera hopi di su miembronan den camponan di concentracion. Tog, otro hendenan cu a pretendé di ta siguidónan di Cristo no a protestá. Mas aleu e buki ta bisa: “Católico i protestantnan en general a mustra mas hostilidad cu simpatia pa Testigonan di Jehova, i nan tabata mas di acuerdo cu Hitler su idealnan cruel cu esnan pacífico dje Testigonan.” Sin duda, nan silencio a haci e maltrato dje Testigonan bou dje régimen nazi pió.

Miéntras cu e enbolbementu di iglesianan den política nazi ta sigui ser un fuente di controversia ardiente, Betrayal ta yama Testigonan di Jehova “un grupo religioso cu a nenga di apoyá of colaborá cu e régimen.”