Obranan Excelente Ta Duna Gloria na Dios

HENDE cu ta stima Dios ta haci esfuerso pa reflehá e lus spiritual di su Palabra, Bijbel. Dje manera ei, nan ta sigui e mandamentu di Jesus: “Laga boso lus briya dilanti hende, pa nan por mira boso obranan excelente i duna gloria na boso Tata cu ta den shelu.” (Mateo 5:16) Tantu abla como conducta recto por duna gloria na Dios.

Testigonan di Jehova ta purba agradá Dios dor di actua na armonia cu Bijbel i dor di haci esfuerso pa yuda otro hende spiritualmente. Nan ta haci esaki asta den paisnan caminda nan ministerio público no ta legalmente registrá ainda. Den e capital di un dje paisnan aki, e Testigonan ta tene congresonan anual na cua cantidadnan di 6.000 te cu 9.000 persona sa asistí. P’e reunionnan ei, nan ta huur salanan den complehonan caminda hende sa tene exhibicion. Mescos cu nan a haci den añanan anterior, promé cu nan congreso di 1999, cientos di Testigo a traha duru pa limpia e facilidadnan i pa instalá un sistema di zonido i pone miles di stul.

Hende no a keda sin ripará tur e preparacionnan aki. Personal di gerencia dje compleho a observá e actividadnan aki. Nan a ripará tambe cu aunke e asistencia máximo tabata 15.666 persona, tur cos a cana sin problema i cu e Testigonan tabata hopi ordená. Tambe e staf a keda impresioná cu e limpiesa cabal cu e rumannan a haci despues dje congreso.

E gerencia a mustra aprecio pa tur esaki dor di pone e Testigonan riba e lista di prioridad pa asina nan por a haña e promé chens pa huur e lugá e siguiente aña. Pero e gerencia a haci asta mas. Dia 15 di juli 1999, nan a duna e comité di congreso un plakat di aprecio. E plakat tabata grabá cu e palabranan “e congregacion di Testigonan di Jehova”—algu cu bo no ta verwagt den un pais caminda nan trabou di educacion bíblico ta bou di restriccion.

Den henter mundu durante e periodo di aña 2000 pa 2001, ta spera cu miyones di hende ta bai asistí n’e cientos di Congresonan di Distrito di Testigonan di Jehova “Hacidónan dje Palabra di Dios.” Dor di ta presente, bo por observá personalmente con esnan cu sinceramente ta haci loke Bijbel ta bisa, ta participá den obranan excelente cu ta duna gloria na Dios.