Pakico Ser Pordonador?

“CIENTIFICONAN ta haciendo investigacion cu a cuminsá demostrá cu pordoná por tin un bon efecto riba salú emocional i, muy probablemente, riba salú físico tambe,” segun un informe di e korant The Toronto Star di Cánada. Sin embargo, profesor Carl Thoresen di Universidad di Stanford, Merca, investigadó principal dje Proyecto Pordoná di Stanford, ta comentá cu tin “masha poco hende cu ta comprendé kico pordoná ta i con e ta funcioná.”

Berdadero pordon ta ser considerá como un aspecto vital di cristianismo. E informe den The Toronto Star ta definí pordoná como “reconocé cu nan a haci bo malu, renunciá tur rencor cu bo tin como resultado, i cu tempu reaccioná n’e ofensor cu compasion i asta amor.” Mester distinguí pordoná for di cera wowo pa un ofensa of hustificá, lubidá of nenga un ofensa; tampoco e no ta nificá pone bo mes bek den un situacion caminda nan ta abusá di bo. E informe ta bisa cu e clave pa berdadero pordon ta “deshací di rabia i sintimentunan negativo.”

Investigadónan ta bisa cu mester investigá mas aleu e beneficionan físico di pordoná. Sin embargo, nan ta informá di beneficionan sicológico, entre nan “ménos stres, ansiedad i depresion.”

Efesionan 4:32 ta expresá un motibu noble pa ser pordonador. E ta bisa: “Bira bondadoso cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.” Ora ta trata di pordoná, mescos cu den otro aspectonan, Bijbel ta urgi nos pa imitá Dios.—Efesionan 5:1.

Nenga di pordoná otro hende ora tin base pa misericordia por daña nos relacion cu Dios. Jehova ta verwagt di nos cu nos ta pordoná otro. E ora ei nos por pidié si e por pordoná nos.—Mateo 6:14; Marco 11:25; 1 Juan 4:11.