Ken Lo Caba cu Violencia?

NA SEPTEMBER 1999, secretario general di Nacionnan Uní (ONU), Kofi Annan a duna un bon biní n’e delegadonan dje di 54 sesion dje Asamblea General anual. The Toronto Star, a informá cu el a reta e lidernan mundial, bisando: “Tin un gran cantidad di hende cu tin mester di mas cu djis palabranan di consuelo for dje comunidad internacional. Nan tin mester di un compromiso real i continuo pa yuda caba cu nan ciclonan di violencia, i pone nan riba un caminda safe cu ta hiba na prosperidad.”

ONU i su nacionnan miembro por percurá p’e “compromiso real i continuo” cu ta necesario pa caba cu violencia? Den e mésun informe The Toronto Star a cita presidente di Merca, Bill Clinton: “Nos sa cu despues di tur e dramamentu di sanger cu a sosodé den e siglo aki ta fácil pa bisa ‘nunca mas,’ pero ta hopi mas difícil pa cumpli cuné.” El a agregá: “Primintí demasiado por ta mes cruel cu mustra tiki interes.”

Mas cu 2.500 aña pasá, profeta Jeremías a bisa di esfuersonan humano: “Mi sa masha bon, o Jehova, cu e caminda di hende terenal no ta pertenecé na dje. No ta pertenecé na hende cu ta canando pa ni sikiera dirigí su paso.” (Jeremías 10:23) Ki speransa tin anto, cu lo bin un fin na violencia?

Manera nos ta lesa na Isaías 60:18, Dios ta duna e siguransa: “Lo no tende mas di violencia den bo tera, ni di sakeo of kibramentu den bo fronteranan.” E profecia ei a haña su cumplimentu inicial ora Dios a trece su pueblo exiliá bek na nan tera natal. Tambe e tin un cumplimentu mas grandi cu nos por disfrutá di dje. Jehova Dios no ta “primintí demasiado.” Como e Haltísimo i Creador di humanidad, e ta den e mihó posicion pa caba cu e “ciclonan di violencia.” Bou dje Reino di Dios, pas lo prevalecé. Violencia lo a pasa pa historia pa semper!—Daniel 2:44.