Dunamentu Cu Ta Precioso den Bista di Jehova

E oficina di sucursal di Testigonan di Jehova na Mozambique a ricibí e siguiente carta:

“Mi ta un mucha homber di shete aña. Ainda mi ta bai scol básico. Mi ta manda e cen aki cu mi a gana dor di cria un puitu. Mi a bend’é pa 12.000 meticais [2 florin]. Mi ta gradicí Jehova cu el a laga e promé puitu cu mi a cria crece bira un gai. Lo mi tin gana pa boso usa mi regalo p’e obra di Jehova su Reino.

P.S. Ta mi tata a yuda mi skirbi e carta aki.”

Tin hende ta asociá generosidad cu esnan cu tin un abundancia di cosnan material. Sin embargo, ora nos lesa e relato bíblico tocante e biuda cu a tira “dos moneda chikitu di masha poco balor” den e caha di placa, nos por comprendé cu generosidad ta ser midí, no n’e cantidad, sino n’e inclinacion corecto di curason.—Lucas 21:1-4.

Jehova ta apreciá tur regalo cu ta bini di un curason motivá pa amor, sin importá con chikitu e ta. I e ta bendicioná ricamente esnan cu ta imitá su generosidad dor di duna nan tempu, energia of recursonan material na beneficio di su Reino.—Mateo 6:33; Hebreonan 6:10.