Informe di Proclamadonan di Reino

“Boso Sa Asina Hopi Cos di Bijbel”

ORA Jesus na edad di 12 aña a papia cu curashi cu e lidernan religioso na Jerusalem, “tur esnan cu tabata scuch’é a keda asombrá di su comprendimentu i di su contestanan.” (Lucas 2:47) Awe tambe, hopi sirbidó hóben di Jehova ta tuma un curashi pa papia tocante Dios i Bijbel cu nan maestro i compañeronan di scol, i nan tambe hopi bes tin e mésun resultado satisfaciente.

Tiffany di 14 aña, tabata hañando un les durante cua e combersacion a bai riba e profecia bíblico dje 70 simannan di aña, hañá na Daniel 9:24-27. E maestro a mencioná un par di echo tocante e versículonan i a pasa lihé dor dje tema aríbariba.

Na promé instante, Tiffany a vacilá pa hisa su man. E ta conta: “Pero pa un motibu of otro, e echo cu e versículonan ei no a ser splicá completamente a keda traha riba mi. I promé cu mi sa, mi man a bai laira.” E maestro a keda asombrá cu un hende tabatin algu di bisa tocante e tema, ya cu mayoria alumno tabatin problema pa asta comprend’é.

Ora Tiffany a haña e chens pa splica e profecia, el a lanta para i a papia sin usa nota. Ora el a caba, e klas a keda ketu-ketu. Tiffany tabata un poco nervioso. Anto e klas a cuminsá bati man cu smak.

E maestro a keda ripití: “Esei ta hopi impresionante, Tiffany, esei ta hopi impresionante.” El a admití cu e tabata sa cu e versículonan ei mester tabata nificá mas, pero Tiffany tabata e promé persona cu hamas a splica nan asina cla p’e. Na fin dje les, el a puntra Tiffany con bini e sa asina hopi cos di Bijbel.

Tiffany a contestá: “Pasobra mi ta un Testigo di Jehova. Mi mayornan mester a splica mi e profecia ei vários biaha promé cu mi a comprend’é.”

Su compañeronan di klas tambe a keda asombrá di su conocimentu di Bijbel. Un alumna a bisa Tiffany: “Awor mi sa di con Testigonan di Jehova ta bai di cas pa cas; ta pasobra boso sa asina hopi cos di Bijbel.” Otro alumnonan a primintí cu nunca mas nan lo tent’é tocante su creencianan.

Ora Tiffany a conta su mayornan tocante su experencia, nan a sugerí p’e ofrecé su maestro e buki Conocimentu cu Ta Hiba na Bida Eterno. Ora el a haci esei i a mustra e maestro e parti cu ta splica e profecia di Daniel, mesora e maestro a aceptá e buki i a gradicié p’e.

Realmente, ora hóbennan cristian papia cu curashi tocante loke nan mayornan a siña nan di Dios i Bijbel, nan ta trece alabansa i onor na Jehova i bendicion pa nan mes.—Mateo 21:15, 16.