Con Jehova Lo Corda Riba Bo?

“CORDA riba mi, sí, o mi Dios.” Vários bes Nehemías a haci peticion na Dios cu e palabranan ei. (Nehemías 5:19; 13:14, 31) Ta masha normal cu ora hende haña nan den problema, nan ta acudí na Dios cu rogamentu asina.

Pero, kico hende tin na mente ora nan ta pidi Dios pa corda riba nan? Claramente, nan ta spera pa Dios haci mas cu djis corda nan nomber. Sin duda, nan tin e mésun speransa cu un dje criminalnan cu a ser ehecutá huntu cu Jesus. Esun aki, distinto for dje otro, a roga Jesus: “Corda riba mi ora bo drenta den bo reino.” E no tabata kier pa Jesus corda so ken e tabata, pero tambe haci algu p’e, esta, resucit’é.—Lucas 23:42.

Consistentemente, Bijbel ta mustra cu cerca Dios, “corda riba” ta nificá tuma accion positivo. Por ehempel, despues cu e tera tabata inundá bou di awa dje diluvio pa 150 dia, “Dios a corda riba Noe . . . , i Dios a laga un bientu pasa riba tera, i e awanan a cuminsá baha.” (Génesis 8:1) Siglonan despues, Samson, kende tabata ciegá i mará na cadena dor dje filisteonan, a pidi den oracion: “Jehova, corda riba mi, por fabor, i fortalecé mi, por fabor, djis e biaha aki so.” Jehova a corda riba Samson dor di dun’é forsa sobrehumano pa asina e por a venga su mes contra Dios su enemigunan. (Huesnan 16:28-30) Pa loke ta trata Nehemías, Jehova a bendicioná su esfuersonan, i adoracion berdadero a ser restorá na Jerusalem.

Apostel Pablo a skirbi: “Tur loke a ser skirbí den tempu pasá a ser skirbí pa nos instruccion, pa mediante nos awante i mediante e consuelo for dje Scritura nos por tin speransa.” (Romanonan 15:4) Si nos ta corda riba Jehova dor di busca pa haci su boluntad, mescos cu su fiel sirbidónan a haci den pasado, nos por tin sigur cu Jehova lo corda riba nos dor di yuda nos haña nos necesidadnan diario, dor di apoyá nos durante prueba i dor di libra nos ora e trece huicio riba e malbadonan.—Mateo 6:33; 2 Pedro 2:9.