Informe di Proclamadónan di Reino

Expansion Teocrático na Namibia

PROME bes cu e bon nobo dje Reino di Dios a yega Namibia tabata na fin di añanan ’20. Di e tempu ei pa awor, cientos di hende sincero a respondé na Dios su mensahe di salbacion. E siguiente experencianan ta mustra con Jehova ta recogiendo e hendenan deseabel aki den su tou.—Ageo 2:7.

◻ Paulus, un homber na nortoost di Namibia cu ta biba di loke e ta sembra, a drenta den contacto cu Testigonan di Jehova pa promé bes ora el a bishitá Windhoek, e stad capital. Paulus a keda convencí mashá lihé cu el a haña e berdad. El a bai cas bek cu e buki Bo por biba pa semper den Paradijs riba tera. Despues, ora el a biaha bai Rundu, e pueblo mas cerca caminda tabatin un Salon di Reino, Paulus a topa e Testigonan i el a roga nan pa bishit’é.

Pero e distancia tabata muchu leu pa e Testigonan bin conducí un studio di Bijbel tur siman cu Paulus. Determiná, Paulus a cuminsá studia Bijbel riba su mes. Ademas, el a predicá na otronan cu celo tocante e cosnan cu e tabata siña. Cu tempu a forma un grupo di studio di Bijbel. Ora e grupito a tende na radio cu lo tene un asamblea di Testigonan di Jehova na Rundu, nan a pone nan entradanan scars huntu i regla transporte pa nan por asistí.

Pa nan tabata un experencia sumamente emocionante di por a asociá pa promé bes cu Testigonan di Jehova! Pronto areglo a ser hací pa rumannan cualificá bishitá e grupo aki regularmente. Awe, tin seis publicadó den e pueblito caminda Paulus ta biba.

◻ Johanna su interes den e nomber di Dios a lanta ora el a tende un hende papia malu tocante Testigonan di Jehova. E ta corda: “E promé bes cu mi a tende e nomber di Jehova, el a keda permanentemente grabá den mi mente, i mi a cuminsá puntra mi mes ta ken ta Jehova. Mi tabata biba cu mi casá cerca di Walvis Bay na costa di Namibia. Na un ocasion nos a bai stad, anto mi a mira algun Testigo ta ofrecé e revista Toren di Vigilancia riba caya. Mi a tuma un ehemplar, anto mi a pidi nan un studio di Bijbel, dor cu mi tabatin hopi pregunta. Mi a yora ora nan a bisa mi cu nan no por a bini dor cu nan auto a daña. Poco tempu despues mi casá a muri, i mi a bai biba na Keetmanshoop. Un pionero special (evangelisadó di tempu completo) tabata asigná pa traha einan, i mi a obtené e buki E berdad cu ta hiba na bida eterno cerca dje. For di cuminsamentu mi a reconocé e zonido dje berdad.

Cu tempu nan a invitá mi pa tuma parti den e trabou di evangelisá, pero miedu di hende a caba cu mi. Canando di porta pa porta, mi tabata pidi Jehova pa e laga mi muri na lugá di pone mi predicá. Promé bes cu mi a tuma parti den predicacion riba caya, mi a sconde den un hanchi smal, sperando cu niun hende lo no mira mi. Finalmente mi a reuní suficiente curashi pa mi saca mi man pa mustra un hende un revista, i ta te e ora ei numa mi a logra bisa algu. Riba e dia ei, cu Jehova su yudansa, mi a compartí mi speransa bíblico cu decenas di hende.

Awe, 12 aña despues, apesar cu mi ta pober den sentido material, ainda mi ta duna balor na mi privilegio di sirbishi di pionero, i mi ta sigui saca un enorme goso di compartí e berdad dje Reino cu otronan.”