Prepará p’e Milenio Cu Ta Conta!

E REINO di Mil Aña di Cristo lo trece un cantidad di bendicion p’e famia humano. Bou di Jesus su direccion amoroso, lo elevá humanidad for di su condicion actual deplorabel na perfeccion glorioso. Pensa riba loke esei por nificá pa bo. Salú radiante! Imaginá bo ta lanta tur mainta ta sinti bo mihó cu e dia promé. Miyones di homber, muher i mucha ta anhelá pa biba durante e tempu felis ei. Nan ta conta riba dje i ta pidi p’e den oracion. Nan estudio di Bijbel a convencé nan cu nan por disfrutá dje bendicionnan aki.

Sin embargo, promé cu Jesucristo cuminsá su Reino di Mil Aña, e tin cu eliminá for di tera tur hende cu ta oponé su gobernacion. Lo e haci esaki n’e bataya cu Bijbel ta yama Armagedon. (Revelacion 16:16) Cristian berdadero riba tera lo no bringa den e guera ei. Esei ta e guera di Dios. I lo e no ta limitá na un solo sitio geográfico. Bijbel ta bisa cu lo e alcansá e skinanan mas remoto di tera. Enemigu di Cristo su gobernacion lo ser matá. Ningun di nan lo scapa!—Jeremías 25:33.

E ora ei Jesus lo dirigí su atencion na Satanas e Diabel i su demoñonan. Visualisá e esena, manera e escritor dje buki di Revelacion a mir’é: “Mi a mira un angel [Jesucristo] baha for di shelu cu yabi dje abismo i un cadena grandi den su man. I el a gara e dragon, e colebra original, cu ta Diabel i Satanas, i a mar’é pa mil aña.” (Revelacion 20:1, 2) Despues, Satanas i su demoñonan lo ser destruí pa semper.—Mateo 25:41.

“Un multitud grandi, cu ningun hende por . . . conta,” lo sobrebibí Armagedon. (Revelacion 7:9) Cristo lo guia esakinan pa beneficiá plenamente for di “fonteinnan di awa di bida,” mescos cu un wardadó di carné ta guia su tou na awa cu ta salba bida. (Revelacion 7:17) Sin Satanas i su demoñonan pa stroba nan progreso spiritual, e sobrebibientenan aki di Armagedon lo ser yudá gradualmente pa vence nan tendencianan pecaminoso te ora nan finalmente alcansá perfeccion!

Bou di Cristo su gobernacion amoroso, condicionnan di bida lo mehorá continuamente. Pa medio di Jesucristo, Jehova Dios lo eliminá tur causa di dolor i tristesa. “Lo e seca tur lágrima di nan wowo, i lo no tin morto mas, ni lo no tin lamento ni sclamacion ni dolor mas.” (Revelacion 21:4) Profeta Isaías ta completá e cuadro, bisando: “N’e tempu ei wowo di esnan ciegu lo ser habrí, i orea mes di esnan surdu lo ser habrí. N’e tempu ei esun coho lo subi mescos cu un biná, i lenga di esun muda lo sclama di alegria.” (Isaías 35:5, 6) I e mortonan, “grandi i chikitu,” lo bini bek na bida cu e posibilidad di no tin cu muri hamas atrobe!—Revelacion 20:12.

For di awor aki, Jehova ta recogiendo e “multitud grandi” cu lo sobrebibí Armagedon. Nan ta preparando pa Cristo su Reino di Mil Aña. Aunke nan no sa ki dia e reinado ei lo cuminsá, nan ta sigur cu na Dios su debido tempu, lo e ser introducí. Abo por ta entre nan, pero bo tambe mester ta prepará—no dor di bende bo pertenencianan i biaha bai na un sitio geográfico, sino dor di gana conocimentu exacto di Jehova Dios i di su propósitonan mediante un studio di Bijbel. Sin ningun costo ni obligacion, Testigonan di Jehova gustosamente lo mustra bo con abo i bo famia por saca beneficio for di un studio di Bijbel. E publicadónan dje revista aki lo ta contentu pa duna bo mas informacion.

[Kuadro na página 7]

E Mil Aña Ta Literal of Simbólico?

Como cu mayor parti dje buki bíblico di Revelacion a ser skirbí den idioma simbólico, ta surgi un pregunta. Kico di Cristo su Reino di Mil Aña mencioná den Revelacion? Esei ta un periodo literal of simbólico?

Tin tur indicacion cu aki ta trata di un periodo literal di mil aña. Considerá esaki: Apostel Pablo ta referí na Cristo su Reino di Mil Aña, durante cua lo husga humanidad, como un dia. (Echonan 17:31; Revelacion 20:4) Apostel Pedro a skirbi cu pa Jehova un dia (24 ora) ta manera mil aña. (2 Pedro 3:8) Esei ta indicá cu e “dia” di huicio aki ta literalmente mil aña largu. Ademas, na Revelacion 20:3, 5-7, nos ta lesa cuater diferente bes, no di “mil aña” den sentido general, sino di “e mil aña.” Esaki ta parce di indicá un periodo cu un largura definí.