“Si Salu Perde Su Forsa”

A BRINGA gueranan p’e. A us’é como un medio di cambio. Den antiguo China, oro so tabatin mas balor cuné. Sí, pa hopi tempu caba hende a considerá salu como un producto di hopi balor. Te dia djawe, ta atribuí cualidadnan curativo i antiséptico na dje. Rond mundu hende ta us’é pa duna sabor i como preservativo.

En bista dje hopi cualidadnan deseabel di salu i su uso, no ta un sorpresa cu Bijbel ta us’é den sentido figurativo. Por ehempel, e Ley di Moises a rekerí pa tur cos cu hende ofrecé riba altar na Jehova ta salgá (salá). (Levítico 2:13) Esaki no tabata pa drecha e smak dje sacrificionan, pero probablemente pasobra salu a representá libertad for di corupcion of decadencia.

Den su famoso Sermon Riba Ceru, Jesucristo a bisa su siguidónan: “Boso ta e salu dje tera.” (Mateo 5:13) Cu e expresion aki Jesus a indicá cu nan predicacion na otro hende tocante e Reino di Dios lo mester tabatin un potencial efecto conserbador, esta salbador di bida, riba nan oyentenan. Sí, esnan cu a aplicá e palabranan di Jesus lo tabata protehá dje decadencia moral i spiritual cu a existí den e comunidadnan caminda nan a biba i sirbi.—1 Pedro 4:1-3.

Sin embargo, Jesus a sigui spierta: “Pero si salu perde su forsa, . . . e no ta sirbi pa nada sino pa ser tirá afó pa hende trapa.” Comentando riba esaki, erudito bíblico Albert Barnes a bisa cu e salu cu Jesus i su apostelnan a conocé tabata unu “no-refiná, mesclá cu substancianan for di mata i tera.” Pues si salu perde su smak, ta “un cantidad considerabel di substancia di tera” ta loke lo a keda. “Esaki,” Barnes a remarcá “no tabata sirbi pa nada . . . sino pa basha riba caminda of patio, manera ta usa krakustenchi.”

Cristiannan mester haci caso dje spiertamentu aki i soru pa nan no stop di duna testimonio públicamente of pa nan no cai bek den patronchinan di conducta malbado. Sino, nan lo bai atras spiritualmente i nan lo por bira inútil, manera ‘salu cu a perde su forsa.’