Bo Stima Bida?

“LAGA mi mira lus.” Segun informe, eseinan tabata palabranan cu e poëta italiano Giacomo Leopardi a bisa esnan cu tabata cuid’é, djis promé cu su morto. Lus ta representá bida, i e palabranan ei ta indicá hende su deseo intenso pa biba, pa mira lus.

Deseo intenso pa biba ta un impulso precioso cu ta impulsá mayoria hende pa evitá peliger i pa haci tur loke nan por pa sigui biba. Den esaki, hende no ta muchu diferente for di bestia, cu tambe tin un instinto fuerte pa sobrebibí.

Pero ki clase di bida ta ègt bale la pena biba i stima? Esei no ta un simpel existencia fisiológico, esta, djis hala rosea i move. Un actitud di saca-mas-tantu-posibel-for-di-bida generalmente no ta duna satisfaccion tampoco. E filosofia epicureo, “laga nos come i bebe, pasobra mañan nos tin cu muri,” por lo general no a duna hende contentamentu. (1 Corintionan 15:32) Aunke ta berdad cu hende tin cierto necesidadnan material básico, e tin tambe interesnan cultural i social, pa no mencioná mes necesidadnan spiritual, cu ta conectá cu fe den un Ser Supremo. Lamentablemente, den hopi área di mundu cientos di miyones, si no ta miles di miyones, di hende apénas por wanta cabes riba awa debí na condicionnan social i ambiental miserabel. Ken cu ta limitá nan mes primordialmente na satisfacé nan necesidadnan físico—come, bebe, poseé cos material of satisfacé deseo sexual—ta mas o ménos hiba un bida carnal for di cua nan ta saca masha tiki contentamentu. Eigenlijk, nan no ta haciendo uso dje recursonan mas significativo cu bida ta ofrecé pa satisfacé e mente i emocionnan humano. Ademas, ken cu ta busca pa cumpli cu djis nan deseonan egoista no solamente ta keda sin saca lo mihó di bida, sino tambe ta haci daño n’e sociedad den cua nan ta biba, i nan no ta promové e interesnan di otro hende.

Un hues cu ta trata caso di delincuentenan hubenil ta confirmá esaki bisando cu “crísis di balornan moral, glorificacion di ‘role model’ negativo, i éxito dor di gana placa lihé i fácil” tin tendencia di “promové un spiritu di competencia exagerá.” Esaki ta hiba na comportacion cu ta dañino pa sociedad i destructivo pa hóbennan, foral ora nan recurí na droga.

Bo sa cu bida ta ofrecé hopi atraccion: vakansi na lugánan fasinante, lectura of investigacion interesante, compañerismo agradabel i música bunita. I tin otro actividadnan cu ta trece algun of hopi satisfaccion. Esnan cu tin un fe profundo den Dios, i particularmente den e Dios di Bijbel, Jehova, tin mas motibu pa stima bida. Berdadero fe ta un fuente di fortalesa i serenidad cu por yuda hende trata cu tempu difícil. Esnan cu ta kere den e Dios berdadero por bisa cu confiansa: “Jehova ta mi yudante; lo mi no tin miedu.” (Hebreonan 13:6) Hende cu sa di Dios su amor ta sinti cu e ta stima nan. Nan ta respondé na su amor i ta saca goso profundo for di dje. (1 Juan 4:7, 8, 16) Nan por hiba un bida activo i inegoista cu ta un fuente di satisfaccion. Ta net manera Jesucristo a bisa: “Tin mas felicidad den duna cu tin den ricibí.”—Echonan 20:35.

Lamentablemente, e bida actual tin un otro aspecto tambe. Tur caminda tin sufrimentu, inhusticia, pobresa, enfermedad i morto—pa mencioná djis algun dje cosnan doloroso cu hopi bes ta haci bida casi insoportabel. Sálomon, e rey ricu, poderoso i sabí dje antiguo nacion di Israel, no tabata falta ningun dje recursonan cu por haci hende felis. Tog, tabatin algu cu a molesti’é. Esei tabata e realisacion cu ora e muri, lo e tabatin cu laga pa otro hende tur loke el a logra cu “su trabou duru.” Trabou cu el a efectuá “cu sabiduria i cu conocimentu i cu abilidad.”—Eclesiástes 2:17-21.

Mescos cu Sálomon, mayoria hende ta conciente con corticu bida ta, i cu e ta pasa bai muchu lihé. E Scritura ta bisa cu Dios ‘a pone eternidad den nos mente.’ (Eclesiástes 3:11, Byington) E sintimentu aki pa eternidad ta impulsá hende pa meditá riba con corticu bida ta. Si a lo largu un hende no haña contesta convincente riba e nificacion di bida i morto, sintimentu di pesimismo i banidad por bira un carga pisá p’e. Esaki por haci bida tristu.

Tin contesta riba hende su preguntanan angustioso? Un dia lo yega di tin condicionnan cu ta haci bida mas atractivo i mas duradero?