Guia pa Scoge Bon Asociacion

HOBENNAN ta preferá di acudí na nan pareunan cu na nan mayornan pa haña guia en cuanto paña i música, segun un informe den Reader’s Digest. P’esei ta vital pa mayornan sa cu ken nan yunan ta anda i na unda.

“Ta bo responsabilidad pa investigá,” segun Esmé van Rensburg, orador principal dje departamento di sicologia na un universidad di Sur Africa. E ta agregá: “Tin hopi chens cu bo yu lo rabia cu bo, pero e ta calma despues.” Anto e ta duna e siguiente tipnan na mayornan. Reglanan mester ta lógico i basá riba principionan definí. Scucha bo yu. No reaccioná exagerá, sino keda calmu i sa kico bo kier bisa. Si ya caba bo yu a desaroyá un amistad cu un compañero indeseabel, concentrá riba e comportacion inaceptabel cu e amistad a promové en bes di djis prohibié di sigui asociá cu e persona.

Pa hopi tempu caba mayornan tin bon conseho na nan alcanse den e Palabra di Dios, Bijbel. Por ehempel, e ta bisa: “[Sea] lihé pa tende, slow pa papia, slow pa rabia.” (Santiago 1:19) Tambe e Scritura ta duna e excelente conseho aki en cuanto e amigunan cu bo ta scoge: “Esun cu ta cana cu hende sabí lo bira sabí, pero esun cu tin trato cu hende estúpido lo bai e malu.” (Proverbionan 13:20) E ehempelnan aki ta ilustrá e sabiduria disponibel pa esnan cu ta lesa Bijbel cu aprecio i cu ta aplicá loke e ta bisa den nan bida diario.