E Nomber Divino Pronunciá na Israel

PA SIGLONAN, hudaismo tradicional a prohibí su siguidónan estrictamente pa pronunciá e nomber divino, Jehova. Segun Mishna, ken cu pronunciá e nomber di Dios lo “no tin parti den e mundu binidero.”—Sanedrin 10:1.a

Dia 30 di januari 1995, e ex-rabi principal sefardita di Israel a pronunciá e nomber divino deliberadamente. El a haci esaki ora e tabata recitá un tikkun, esta, un oracion di coreccion di debotonan di cabala. Nan ta pronunciá e oracion aki pa Dios por restorá un grado di armonia den universo, armonia cu, segun e adoradónan, forsanan malbado a perturbá. E korant Yedioth Aharonoth di 6 di februari 1995, a bisa: “Esaki ta un liturgia di un poder asina tremendo cu ta den un foyeto special so bo ta haña su palabranan. I nan no ta bende e foyeto cu público.” Hende ta kere cu inbocá e nomber di Dios den e contexto aki ta agregá extra forsa n’e peticion.

Ta notabel cu Bijbel ta manda sirbidónan di Dios usa e nomber divino, Jehova. (Exodo 3:15; Proverbionan 18:10; Isaías 12:4; Sofonías 3:9) Den e texto di Bijbel original na hebreo, e nomber ei ta aparecé casi 7.000 biaha. Sin embargo, Bijbel ta spierta pa no malusá e nomber di Dios. E di tres dje Dies Mandamentu ta bisa: “Bo no mag tuma e nomber di Jehova bo Dios den un manera indigno, pasobra Jehova lo no laga esun cu tuma su nomber den un manera indigno sin castigu.” (Exodo 20:7) Con un hende lo por tuma e nomber di Dios den un manera indigno? Un comentario dje Sociedad Editorial Hudiu ta bisa cu e término hebreo traducí “den un manera indigno” por encerá no solamente ‘uso con-cu-ta’ dje nomber divino, sino tambe “recitá un bendicion innecesario.”

Con anto nos mester mira tikkun, e oracion di coreccion di debotonan di cabala? Kico ta su orígen? Den siglo 12 i 13 E.C., un forma místico di hudaismo, cu yama cabala, a bira popular. Den siglo 16, Isaac Luria, un rabi, a introducí “tikkunim” den liturgia di debotonan di cabala. Nan a usa e nomber di Dios como un amuleto místico cu podernan special, i el a bira parti dje ritual di debotonan di cabala. Bo ta haña esaki un uso corecto dje nomber di Dios?—Deuteronomio 18:10-12.

Con cu bo contestá e pregunta ei, un cos sí bo mester ta di acuerdo cuné: e echo cu nan a pronunciá e nomber di Dios den público na Israel djawe tabata un suceso masha extraordinario. Tog, Dios mes a pronosticá: “Den e dia ei lo bo bisa sigur: ‘Duna danki na Jehova! Inbocá su nomber. Duna di conocé su tratonan entre e pueblonan. Haci mencion di cu su nomber ta poné na haltu. Haci melodia na Jehova, pasobra el a obra di manera sobresaliente. Esei ta ser duná di conocé den henter e tera.’”—Isaías 12:4, 5.

Afortunadamente, Testigonan di Jehova den Israel, i tambe den mas cu 230 pais rond mundu, ta haciendo tur esfuerso pa yuda nan próhimo gana conocimentu exacto di Jehova. Nan tin speransa cu hopi hende mas lo bin comprendé e nificacion di textonan manera Salmo 91:14: “Pa motibu cu el a pone su cariño riba mi [Jehova], ami tambe lo percurá escape p’e. Lo mi proteh’é pasobra el a yega di conocé mi nomber.”

[Nota]

[Plachi na página 28]

Aki na Negeb, Jehova su pueblo ta haci su nomber i su Palabra conocí

[Plachi na página 29]

Poster cu e nomber divino