Violencia—Pronto Lo E Caba pa Semper!

“Violencia Ta Pone Nacion den Peliger”—The New York Times, Merca.

“Violencia Doméstico”—O Globo, Brazil.

“Violencia Ta Persiguí Muhernan Rond Mundu”—The Globe and Mail, Cánada.

E TITULARNAN aki di korant di Nort i Sur América ta ilustrá un tendencia inkietante na tur parti di mundu. Recientemente e Organisacion Mundial di Salú a describié asina aki: “Den décadanan recien tur clase di violencia a aumentá drásticamente.”

Considerá algun cifra cu ta pone bo para pensa:

Homicidio. Na Latinoamérica i den Caribe, tur dia un 1.250 hende ta muri un morto violento. Consecuentemente, “den mitar dje paisnan dje region [ei], asesinato ta e di dos causa principal di morto entre hóbennan di e edad di 15 pa 24 aña.”

Violencia contra mucha. Abusu físico, sexual i emocional di mucha ta un problema rond mundu. Por ehempel, “encuestanan cerca adultonan den diferente pais industrialisá ta indicá cu 10 pa 15% di mucha ta víctima di abusu sexual, di cua mayoria ta mucha muher.”

Violencia contra hende muher. Despues di a investigá violacion di derechonan humano cu a tuma lugá mundialmente durante 1997, investigadónan a yega n’e conclusion cu “violencia doméstico ta un dje causanan principal di daño contra hende muher den casi tur pais na mundu.” (Human Rights Watch World Report 1998) Ya cu violencia doméstico ta plamá tur caminda pero hopi bes no ta ser raportá, nan ta yam’é awor “e crísis silencioso di siglo 20.”—The Globe and Mail, Cánada.

Asina tambe e tera “a yena cu violencia” den e dianan di Noe. (Génesis 6:9-12) Pero Jehova Dios a conserbá e “predicadó di husticia” ei i su famia bibu “ora el a trece un diluvio riba un mundu di hende malbado.” Den nos dia, Dios lo tuma accion similar. Lo e conserbá “hende deboto na dje” ora e eliminá hende violento i malbado i haci e tera aki un paradijs den su mundu nobo primintí. (2 Pedro 2:4-9; 3:11-13) Sabiendo cu pronto violencia lo caba pa semper, no ta emocioná bo?