Gobiernu Ta Elogiá Testigonan

A Cádiz, Spaña, un stad den un haf situá un 500 kilometer zuidwest di Madrid, alcalde Doña Teófila Martínez a otorgá un plakat (potret ariba) na Testigonan di Jehova. E ta bisa: “Di gobiernu municipal di Cádiz pa Testigonan di Jehova como muestra di aprecio pa nan colaboracion i esfuerso na beneficio dje stad aki.” Kico Testigonan a haci pa ricibí e onor aki?

El a ser duná como reconocimentu dje trabou cu Testigonan a haci pa renobá e stadion municipal dje stad. Pa vários fin di siman cientos di Testigo a traha boluntariamente pa yuda renobá e bañonan den e parti abou dje stadion di futbol di Carranza. Awor, tur hende cu usa e stadion por disfrutá di su sistema di awa i su flur cu nan a instalá.

Pa algun tempu caba, Testigonan di Jehova ta disfrutá di un bon relacion cu e stad di Cádiz. Tur aña gobiernu municipal bondadosamente ta pone Stadion Carranza na disposicion di Testigonan pa tene nan congreso anual. P’esei, e Testigonan ta contentu pa haci loke nan por pa yuda mantené e stadion den un bon condicion.

Sin embargo, ademas cu nan ta duna labor físico asina de bes en cuando, regularmente Testigonan di Jehova ta bishitá nan próhimo den e stad ei pa duna apoyo n’e público den un otro forma. Nan ta proclamá e “bon nobo” dje Reino di Dios. Naturalmente, nan no ta participá den nan ministerio público pa ricibí elogio for di hende. Nan ta hacié den obedencia n’e mandamentu di Jesus pa predicá e “bon nobo dje reino” i pa “haci disipel di hende di tur nacion.” (Mateo 24:14; 28:19) Den e forma aki, Testigonan di Jehova ta spera di sirbi nan comunidad dor di educá hende den “e caminda di husticia.”—Proverbionan 12:28.