Informe di Proclamadónan di Reino

Predicá ‘den Tempu Faborabel i den Tempu Difícil’

ORA cu guera tabata haci desaster den henter e pais di Bosnia i Herzegovina, miles di hende a pasa den dificultadnan teribel. Testigonan di Jehova a haci tur esfuerso pa trece animacion i speransa p’e pueblo den e tempu difícil ei. Loke ta sigui ta parti di un carta di un Testigo cu a sirbi na Sarajevo pa un temporada.

“Aki bida ta duru, pero e hendenan ta masha receptivo pa e berdad di Bijbel. E Testigonan local ta ehempelnan maraviyoso di perseverancia. Nan tin masha poco den sentido material, pero nan tin un spiritu excelente. Casi tur hóben den e congregacion ta den sirbishi di tempu completo. E celo aki ta curashá publicadónan nobo, i no ta nada straño pa nan dedicá 60 ora of mas den e ministerio for di e promé luna cu nan cuminsá den sirbishi.

Ademas di predicá di cas pa cas, nos a purba vários otro método pa alcansá hende. Por ehempel, nos tabatin bon resultado compartiendo publicacionnan bíblico den e cantidad di santananan cu tin den e stad.

A duna testimonio den hospitalnan tambe. E hefe dje Departamento di Cardiologia di un hospital na Sarajevo a aceptá e Spierta! di 8 di december 1996, cu e tema: ‘Atake di Curason—Kico Por Haci?’ El a pidi algun copia extra pa e parti pa e otro dokternan. El a duna e Testigonan permit pa bishitá tur pashent den su departamento. Asina, den ménos cu un ora, nan a laga mas cu 100 revista di cama pa cama. Hopi pashent a bisa cu ta promé biaha cu hende a bishitá nan na hospital pa ofrecé nan animacion i speransa.

Un otro biaha nan a bishitá e Departamento di Pediatria cu artículonan di revista apropiado pa mucha. Hefe dje departamento a aceptá algun ehemplar di Mi buki di relato bíblico tambe pa pone den e sala di lectura. Awor e mamanan cu ta bishitá nan yu den hospital ta lesa relatonan for di Bijbel pa nan tur dia. A haci areglo pa bishitá e dokter aki na cas tambe.

Tin miles di soldá di OTAN [Organisacion dje Tratado di Nort Atlántico] di diferente nacionalidad na Sarajevo. Nan tambe a ricibí un testimonio cabal. Tin biaha nos ta bai di truck di guera pa truck di guera cu e foyeto Buenas nuevas para todas las naciones huntu cu E Toren di Vigilancia i Spierta! den vários idioma. Nos a laga mas cu 200 revista den barak dje soldánan italiano. Pa straño cu por parce, hopi soldá italiano a bisa cu nunca promé nan no a yega di papia cu Testigonan di Jehova. Wel, na Sarajevo nos a logra alcansá nan.

Un dia un truck di guera tabata stacioná cant’i caminda. Mi a bati na e truck cu mi paraplu, i un soldá a sali. Mi a ofrec’é un Toren di Vigilancia cu e tema ‘Mensaheronan di Pas—Ken Nan Ta?’ E soldá a wak mi anto puntra: ‘No ta un Testigo di Jehova bo ta, no?’ Ora mi a bis’é cu sí, el a contestá: ‘Mi no por kere; aki tambe boso ta? Tin un lugá na mundu caminda no tin Testigo di Jehova?’”

Apostel Pablo a animá: “Predicá e palabra, ocupá bo den dje urgentemente den tempu faborabel, den tempu difícil.” (2 Timoteo 4:2) Mescos cu nan compañeronan creyente rond mundu, e Testigonan di Jehova na Sarajevo ta haciendo esei, asta di cama pa cama i di truck di guera pa truck di guera!