“Mi Por A Sinti e Ambiente di Pas”

UN HOMBER di abla aleman a bai un congreso cu Testigonan di Jehova a organisá, p’e “spioná” e Testigonan. Pakico? Su meta tabata pa “desenmascará e secta aki i evitá cu su amigunan ta bai den un mal caminda.” Despues cu el a asistí n’e congreso, el a skirbi su amigunan e siguiente carta:

“Ora mi a yega n’e sitio dje congreso, mi a puntra mi mes si esaki tabata e lugá corecto. No tabatin ningun hende pará pafó, ni no tabatin ningun botter of bleki di cerbes bentá abou. Ora mi a yega mas cerca, mi a mira dos cabayero n’e entrada dje stadion. Nan a cumindá mi i a laga mi drenta.

Mi a verwagt di tende bochincha dje miles di personanan cu lo tabata presente, pero tabata masha ketu. ‘Wel,’ mi a pensa, ‘probablemente lo tin net un man yen di hende plamá aki aya den henter e lugá.’

Ora mi a drenta, mesora e drama cu tabata tumando lugá riba e plataforma a capta mi atencion. Ta te despues mi a realisá cu e stadion tabata yen-yen cu miles di scuchadó atento. Mi por a sinti e ambiente di pas. Loke mi a tende, mira i sinti durante e resto dje congreso, a haci un impresion profundo riba mi.

Meimei dje Testigonan, mi no por a keda sin ripará nan cara felis i nan expresionnan di amor. Di ripiente, mi no por a dominá e pensamentu di cu ‘esaki sí ta e pueblo di Dios!’”

En bes di “evitá cu su amigunan ta bai den un mal caminda,” e yoncuman a pidi nan pa studia Bijbel cuné. E resultado? Awe, e ta un anciano cristian. E cu su famia ta activo den un dje congregacionnan na Zug, Suisa.