Pleitamentu pa un Lugá “Santu”

DIA 15 di juli 1099, e Promé Crusada cu papa di Roma a autorisá, a logra su meta, esta, di capturá Jerusalem. E matansa tabata horibel! E único habitantenan cu a scapa tabata e gobernadó i su wardaespalda, despues cu un montante haltu na soborno a ser pagá. Den su buki titulá The Crusades (E Crusadanan), pastor Anthony Bridge ta informá loke a pasa cu e resto dje habitantenan moslim i hudiu: “Una bes e participantenan n’e crusada a haña lus berde den e stad, nan a entregá na un sed ardiente i teribel pa sanger. . . . Nan a mata tur homber, muher i mucha cu nan por a haña den e stad . . . Ora cu no tabatin ningun hende bibu mas, e vencedónan a marcha den un procesion dor di cayanan dje stad . . . bai n’e Misa dje Graf Santu pa gradicí Dios.”

For di tempu dje conkista dje participantenan n’e crusada, e presencia di cristiandad den Jerusalem tabata marcá pa friccion entre e iglesianan Católico Romano, Oost Ortodox i e asina yamá religionnan cristian. Na aña 1850, un pleitu entre e vários lidernan di iglesia pa e lugánan santu na Jerusalem i rond di dje, tabata e factor principal cu a hiba n’e Guera di Crimea. Inglatera, Francia i Estado di Ottoman a bringa contra Rusia, i esaki a costa bida di mei miyon hende.

E guera no a pone fin n’e discusionnan den cristiandad tocante Jerusalem i su lugánan santu. E ottomannan cu a dominá e pais n’e tempu ei, a purba trece pas dor di parti e lugánan santu entre e diferente organisacionnan religioso. “E principio aki a ser aprobá . . . dor di Nacionnan Uní mediante e Resolucion di Particion di november 1947,” Dr. Menashe Har-el ta splica den su buki titulá This Is Jerusalem (Esaki Ta Jerusalem). “Pues e ta parti di ley internacional.” Como resultado, católiconan romano, griegonan ortodox, armenionan, sirionan i coptonan, tur a bira parcialmente doño dje Misa dje Graf Santu. Finalmente, algun mònik dje Iglesia Abisinio a laga algun di nan miembronan bai biba den hùt riba e dak, pa asina exigí nan derecho riba e misa aki. Hopi hende ta mira e Misa dje Graf Santu como cristiandad su lugá di mas santu. E ta yen di altar, imágen i relikia. Un otro lugá supuestamente santu, ta e Calvario di Gordon, i algun protestant ta vener’é como e lugá unda nan ta pensa cu a mata i dera Jesus.

Hopi tempu pasá, Jesus a bisa un muher cu tabata kere den lugánan santu: “E ora ta bini den cua boso lo no adorá e Tata ni den e ceru aki ni den Jerusalem. . . . E berdadero adoradónan lo adorá e Tata cu spiritu i cu berdad.” (Juan 4:21-24) Pues, cristiannan berdadero no ta venerá lugánan santu. E destruccion di Jerusalem infiel dor dje ehércitonan romano na aña 70 E.C., ta sirbi como un spiertamentu pa cristiandad. Su idolatria, division i culpa di sanger ta mustra cu su afirmacion di ta cristian, ta falsu. P’esei, lo e sufri e destruccion cu Dios a predicí pa tur religion cu ta forma parti di Babilonia e Grandi.—Revelacion 18:2-8.