Bo Ta Pensa Riba Matrimonio?

Si nos compará e fenómeno mundial di divorcio cu un temblor, Merca lo ta su epicentro. Den un aña recien, mas cu un miyon matrimonio a terminá ei; un promedio di dos pa cada minuut. Pero kisas bo ta bon na altura cu Merca no ta su so pará den su calamidad cu matrimonio.

SEGUN un estudio, e porcentahenan di divorcio na Cánada, Francia, Grecia, Hulanda i Inglatera i Gales a bira mas cu dòbel desde 1970.

Nos tin tur motibu pa kere cu mayoria pareha ta drenta matrimonio pasobra nan ta stima otro i kier pasa e resto di nan bida huntu. Pero lamentablemente, hopi bes e soño di un matrimonio felis ta net esei, un soño. Hopi persona a bisa, despues cu nan a realisá bon, cu nan a casa muchu lihé of a casa cu e persona robes of ámbos cos.

Pakico asina tantu matrimonio ta fracasá? “E motibu principal ta falta di preparacion,” segun autor di un buki tocante namoracion. E ta agregá: “Ora mi ta trata cu pareha den e agonia di angustia matrimonial, mi ta hoga den dos sintimentu: duele i rabia. Mi ta sinti duele dor cu nan no a descubrí nan soñonan pa logra un relacion mutuamente satisfaciente. Mi ta sinti rabia debí na nan ignorancia relacioná cu e complehidad dje tarea.”

Sí, hopi hende ta drenta matrimonio cu tiki of sin ningun idea con pa hacié exitoso. Tog, esaki no ta sorprendé nos di ningun manera. Un educadó a comentá: “Cuantu di nos hóbennan no ta pasa scol secundario studiando e comportacion di djaka i lagadishi, pero sin siña tocante comportacion di dos hende yamá esposo i esposa?”

Abo ta pensa riba matrimonio, sea riba e posibilidad di casa un dia of riba e matrimonio cu bo ta aden awor aki? Si ta asina, bo mester ta conciente cu un relacion di bida real ta masha diferente for di esun cu bo ta mira den película, den show di television i den novela. Na mésun tempu, bo por considerá matrimonio di dos hende maduro cu di berdad ta stima otro como un bendicion di Dios. (Proverbionan 18:22; 19:14) Con anto, bo por ta sigur cu bo ta prepará pa cumpli cu e exigencianan di matrimonio? Ki factornan bo mester considerá ora di scoge un casá? Of si bo ta casá caba, con bo por aumentá bo chens di haña felicidad duradero den bo matrimonio?