Informe di Proclamadónan di Reino

Recompensa pa A Busca e Dios Berdadero

DEN siglo 10 P.E.C., adoracion falsu tabata prevalente den e reino di dos tribu di Huda. Pero, meimei dje idolatria reinante aki, tabata biba un homber kende su curason tabata recto pa cu Dios. Su nomber tabata Jehósafat. Profeta Jehú a bisa di dje: “A haña bon cos cerca bo, pasobra bo a . . . prepará bo curason pa busca e Dios berdadero.” (2 Crónicanan 19:3) Mescos awe, den e ‘tempu crítico aki, duru pa trata cuné,’ miyones di hende a ‘prepará nan curason’ pa busca e Dios berdadero, Jehova. (2 Timoteo 3:1-5) E siguiente experencia for di Togo, West Africa, ta confirmá esaki.

Casimir tabata bai scol católico i cu nuebe aña a ricibí su promé Santa Comunion. Sin embargo, pa ora Casimir a haci 14 aña, el a stop di bai misa. Esaki a pone cu el a cuminsá biba cu miedu, pasobra el a kere cu faltamentu di misa lo a mand’é fiernu di candela, of por lo ménos purgatorio.

Na scol Casimir a djoin un grupo di hóben cu tabata bini huntu un bes pa siman pa studia Bijbel. Tambe el a cuminsá lesa Bijbel riba su mes. Na un ocasion Casimir a lesa den e buki di Revelacion tocante un bestia salbahe spantoso cu a sali for di laman. (Revelacion 13:1, 2) Ora el a puntra e lider dje grupo cu ta studia Bijbel tocante e bestia, esaki a bis’é cu e bestia ta algu literal i cu realmente lo e sali for di laman. E splicacion aki a molestiá Casimir, pasobra e no tabata biba leu for di Costa Atlántico. E tabata convencí cu lo e tabata entre e promé víctimanan dje bestia salbahe.

Casimir a cuminsá spar su placa p’e por a hui bai nort den desierto pa asina evitá e bestia salbahe. El a conta un colega di klas tocante su plannan. E colega aki ta un Testigo di Jehova, i el a sigurá Casimir cu no tin ningun bestia literal asina cu lo sali for di laman. Djis despues di esei, el a invitá Casimir p’e reunionnan na Salon di Reino. El a disfrutá di nan i a cuminsá asistí regularmente. Tambe el a aceptá un studio di Bijbel.

Segun cu Casimir a progresá den su studio, oposicion di famia a cuminsá. Su famia tabata practicá adoracion di antepasado i tabata come carni cu sanger aden cu a sobra for dje sacrificionan. Ora cu Casimir, na un manera cortes, a nenga di come e carni, nan a menas’é i bis’é p’e bai for di cas. Casimir a keda calmu, i e famia no a sigui cu e menasanan. Sin embargo, pa tres luna largu e famia a come carni cu sanger so. Casimir tabatin problema pa haña suficiente di come, pero el a wanta esaki i tambe otro dificultadnan.

Casimir a sigui haci progreso spiritual te n’e punto di dedicacion i bautismo. Despues, el a ser nombrá como sirbidó ministerial i el a asistí n’e di cuater klas dje Scol di Entrenamentu Ministerial na Togo. Actualmente, e ta traha como boluntario n’e sucursal.

Sí, e palabranan di Rey David a resultá di ta cierto den hopi caso: “Si bo busca [Jehova], lo e laga bo hañ’é.”—1 Crónicanan 28:9.

[Plachi na página 8]

Casimir (na man drechi) ta traha como boluntario n’e sucursal