“Ta Ken A Pone Sabiduria den e Capanan di Nubia”?

“ORA boso mira un nubia lanta den parti west, unbes boso ta bisa: ‘Ta bini un tempestad,’ i ta sosodé asina. I ora boso mira cu un bientu ta supla di zuid, boso ta bisa: ‘Lo tin un ola di calor,’ i e ta sosodé.” E palabranan aki di Jesus, cu Lucas e escritor di Evangelio a skirbi, ta algun pronóstico di tempu n’e sistema di Palestina di antigwedad. (Lucas 12:54, 55) Bou di cierto circunstancia, hende di ántes por a interpretá señal di tempu i haci pronóstico di corto plaso cu precision.

Awendia, meteorólogonan ta usa instrumento sofisticá, manera satélite rond di tera, radar Doppler i computer potente pa calculá patronchi di tempu pa periodonan mas largu. Pero, hopi biaha nan pronóstico ta robes. Di con?

Tin hopi factor cu ta dificultá pronóstico di tempu. Cambio inesperá di temperatura, humedad, presion atmosférico, i velocidad i direccion di bientu, por ehempel, por complicá asuntu. Riba esakinan tin e interaccionnan complicá di solo, nubia i laman, cu científiconan no ta comprendé bon te ainda. Pa tal motibu, pronóstico di tempu ta keda un ciencia inexacto.

Hende su conocimentu limitá di tempu ta corda nos riba e preguntanan hací na Job: “Ta ken a duna lus na e gotanan di serena? Ta for di ken su barica ijs ta sali realmente? . . . Bo por sikiera hisa bo bos na e nubia, pa un masa brutu di awa mes tapá bo? . . . Ta ken a pone sabiduria den e capanan di nubia, of ta ken a duna e fenómeno den shelu comprendimentu? Ta ken por conta, cu exactitud, e nubianan cu sabiduria, of e poronnan di awa den shelu—ta ken por boltu nan?”—Job 38:28-37.

E contesta pa tur e preguntanan aki ta: No hende, sino Jehova Dios. Sí, ni maske con sabí hende por parce, nos Creador su sabiduria ta hopi, hopi superior. Ta masha amoroso mes di su parti cu el a haci su sabiduria disponibel pa nos den e páginanan di Bijbel, pa nos por haci nos caminda exitoso.—Proverbionan 5:1, 2.