Informe di Proclamadonan di Reino

Un Ex-Opositor Ta Siña e Berdad

E GUERA civil na Liberia tabata hopi den noticia. Decenas di miles di hende a perde nan bida, i hopi mas mester a bandoná nan tera. Apesar dje dificultadnan aki, hende di curason onesto ta sigui aceptá e berdad, manera e siguiente experencia ta mustra.

Di tempu cu e tabatin dies aña, Iglesia Luterano a educá James. Ora el a bira editor di un korant di misa, el a usa su posicion pa skirbi contra Testigonan di Jehova. Anto esaki, apesar cu nunca el a yega di topa un di nan.

Cu tempu, James a kita for dje korant di misa anto bira un exitoso propietario di motel. Un dia, sintá den lobi di su motel, dos ruman muher nèchi bistí a acerk’é. Dor di nan paña nèchi, el a laga nan drenta. Pero ora nan a splica e propósito di nan bishita, e di: “Mi ta muchu ocupá pa papia.” E Testigonan a ofrec’é abonament riba e revistanan Toren di Vigilancia cu Spierta!, i el a aceptá nan djis pa libra di nan. E revistanan a keda yega su cas 12 luna largu, pero e tabata hinca nan den un sacu di plestik sin ni sikiera habri nan pa wak.

Tabatin guera civil, di manera cu James a paketá un sacu cu placa i otro cos balioso pa e hui cuné na e promé señal di un atake. Un mainta un granada a explotá tras di su porta di patras. Den pánico, el a bira gara su sacu i core pa su bida. Huyendo huntu cu miles di otro civilnan, e mester a pasa vários punto di control. Hopi biaha nan tabata horta civilnan inocente na e lugánan ei, anto mata nan sin ningun motibu cla.

Na e promé punto di control, nan a haci James algun pregunta, anto a pidié habri su sacu. Ora cu el a habrié, el a wak aden i e no por a kere su bista. Pa su spantu, el a mira cu e sacu cu el a trece no tabata esun cu su cosnan di balor. Den su ansha, el a coge e sacu cu tur e revistanan Toren di Vigilancia i Spierta! den nan papel lorá. Sin embargo, ora e soldá a wak e revistanan i a lesa su nomber riba nan etiket, e di: “An, ta Testigo di Jehova bo ta. No ta boso nos ta busca, nos sa cu boso no sa gaña.” E soldá a saca un par di revista for dje sacu anto manda James sigui bai.

Mésun cos a sosodé na nuebe diferente punto di control. Tur e comandantenan a suponé cu James tabata un Testigo di Jehova anto a lagu’é pasa sano i salbo. Awor James tabata gradicidu cu e no a bai cu su cosnan di balor, pasobra, di loke e por a mira, casi sigur nan lo a mat’é pa nan.

Ora cu por fin el a yega e último punto di control, i esun mas temí, el a yena cu horor di mira yen di cadaver bentá abou na suela. Morto spantá, el a inbocá Jehova su nomber. El a primintí cu si Dios yud’é pasa e campo di matansa aki bibu, lo e sirbié pa resto di su bida.

James a mustra e soldánan su sacu, i atrobe nan di: “No ta e hendenan aki nos ta busca.” Papiando cuné, nan a agregá: “Un di bo rumannan ta biba na pia dje ceru aki. Bai keda cerca dje.” Na tal punto James su opinion dje Testigonan a cambia por completo caba. El a tuma contacto cu e ruman mesora, i nan a haci areglo pa un studio di Bijbel cu e buki Bo por biba pa semper den Paradijs riba tera.a

Poco dia despues, un atake a obligu’é hui for dje área ei. E biaha aki, James a core drenta mondi cu su buki Biba pa semper so bon gará! Durante 11 luna isolá for dje Testigonan, el a studia henter e buki cincu biaha. Ora cu por fin el a logra bolbe n’e stad, el a reanudá su studio di Bijbel cu e Testigonan anto a progresá lihé. Poco tempu despues el a bautisá, i awor e ta sirbi fielmente cu su rumannan spiritual.

[Nota]