“Tene Duru na Loke Boso Tin”

Un grupo di Testigo tabata predicando riba un dje 30 Islanan Cícladas di Grecia. Miéntras dos di nan tabata predicando di cas-pa-cas, nan a topa un polis cu a bisa nan pa nan sigui su tras bai warda di polis. Djis despues cu nan a yega warda di polis, telefon a ring. Tabata e pastor dje pueblo. “Mi a tende cu tin Testigo di Jehova den e pueblo,” el a bisa. “Sí, mi tin dos aki,” e polis a respondé. “Mi ta bini mesora.” E tono dje combersacion a duna e rumannan un poco miedu.

Sin embargo, ora el a yega, e pastor a smile, duna nan man i a cai sinta riba un stul banda dje polis. Segun cu e combersacion a sigui, e polis a cuminsá pleita miéntras cu e pastor sí a keda razonabel i cortes. El a bisa e polis pa no menospreciá e Testigonan, i el a agregá: “Nan por contestá cualkier pregunta, pasobra nan ta haña entrenamentu den e Scol di Ministerio Teocrático. Lo tabata mas fácil pa bo sagudí tera for di su fundeshi cu cambia e fe di un Testigo di Jehova.”

Ora nan tabata predicá e siguiente mainta, e rumannan a bolbe topa e pastor i nan a puntr’é: “Di con bo tabata asina amabel cu nos durante e combersacion na warda di polis?” E pastor a bisa nan cu el a conocé hopi Testigo na Síros i cu ya caba e tabatin hopi aña ta lesa e revistanan E Toren di Vigilancia i Spierta! De facto, na hopi ocasion el a bai cu un Toren di Vigilancia, scondí den un map, i a us’é den su sermon den misa. El a bisa: “Mi no ta kere cu bida lo tabata bale la pena si mi no tabatin boso literatura. Nan ta yudá mi sigui padilanti.”

Despues, e pastor a bisa e Testigonan: “Un cos mi por bisa boso. Tene duru na loke boso tin. No cometé e fayo di bandon’é. Loke mi ta bisa boso awor, ta e mihó sermon cu mi a yega di duna i mi no ta djis papia pa papia; mi ta men e di henter mi curason.”