Informe di Proclamadonan di Reino

Adaptando Nos Mes Humildemente na e Caminda di Jehova

“BUSCA Jehova, boso tur, e mansunan dje tera.” E invitacion aki cu e profeta hebreo Sofonías a proclamá mas cu 26 siglo pasá, ainda ta ser extendé na hende rond mundu awe. (Sofonías 2:3) Kico ta nificá busca Jehova? E promé paso ta, gana conocimentu dje único Dios bibu i berdadero, Jehova.—Jeremías 10:10; Juan 17:3.

Sin embargo, gana conocimentu riba su mes no ta hiba na un posicion aprobá dilanti Dios. Pa haña e fabor di Dios, bo tin cu aplicá e conocimentu aki tambe. Con? Dor di armonisá bo forma di pensa i actua na Dios su normanan, manera e siguiente experencia for di Surnam ta ilustrá.—Efesionan 4:22-24.

Eddy, un maestro di scol den su trint’i picu aña, tabata anhelá pa haña contestanan satisfactorio riba preguntanan manera: ‘Ki papel religion ta hunga den e sociedad djawe?’ i ‘Bijbel, un buki di antigwedad, ta di acuerdo cu ciencia moderno?’ Ora Testigonan di Jehova a bishitá Eddy i a dun’é contestanan basá riba Bijbel p’e preguntanan aki, el a scucha cu atencion. Asta el a haci anotacion pa verificá e splicacionnan dje Testigonan.

Anteriormente, Eddy tabata asociá cu un religion cu a siñ’é cu hende ta e resultado final di cambionan cu Dios a haci na macacu. Di manera cu ora e Testigonan a ofrec’é e publicacion La vida... ¿cómo se presentó aquí? ¿Por evolución, o por creación? el a acept’é mesora. El a keda impresioná cu e buki su splicacion cla dje relato di Bijbel tocante creacion. Mediante su studio di Bijbel, el a keda convencí cu el a haña e berdad!

Pero awor el a enfrentá un prueba. Eddy tabata biba den un cas caminda ladronicia i desonestidad tabata masha normal. Pues, el a haña su mes ta scoge: sea sigui e bida corupto di su compañeronan di kamber of rechasá e conducta ei na fabor di un estilo di bida cu ta glorificá Dios. Sabiamente, Eddy a scoge pa e último. El a kibra cu tur mal asociacion i a sali for dje cas.—1 Corintionan 15:33, 34.

Eddy a progresá rápidamente despues cu el a cuminsá asistí na e reunionnan na Salon di Reino. Tambe el a bai dilanti den su manera di bisti i di areglá su mes, i a cuminsá papia cu su amigu i famianan tocante loke e tabata siñando. Mas despues, su goso a aumentá ora el a ser aprobá pa participá den predicacion dje “bon nobo” públicamente. (Mateo 24:14; Echonan 20:20) Na december 1996 e dia tan sperá a yega ora el a simbolisá su dedicacion na Jehova pa medio di bautismo bou di awa.

Tur aña, cientos di miles di hende di curason onrado ta respondé n’e invitacion pa “busca Jehova.” Haciendo esei, nan ta experenciá e veracidad di Proverbionan 22:4, cu ta bisa: “E resultado di humildad i e temor di Jehova ta rikesa i gloria i bida.” Sí, dor di armonisá nan bida humildemente n’e caminda di Jehova, stimadónan dje berdad ta gosa di bendicionnan asina awor, i cu confiansa ta anticipá e bendicionnan eterno aki mes riba tera.—Salmo 37:29.

[Maps na página 18]

(Pa teksto den su formato kompleto, wak publikashon.)

Laman Caribe

SURNAM

GUYANA

GUYANA FRANCES

BRAZIL

[Rekonosementu]

Globo: Mountain High Maps® Copyright © 1997 Digital Wisdom, Inc.