“Poderoso i Convincente”

“CUMINSANDO mañan mi ta bai us’é den e trabou di predicá, pasobra e argumentonan cu e ta contené ta realmente poderoso i convincente,” un Testigo di Jehova di Francia a skirbi. Un Testigo di Merca a skirbi: “Mi a les’é mesora i mi no por warda pa us’é den sirbishi di veld, ya cu nos ta topa hopi hende cu ta apático i cu no ta pone confiansa den Bijbel.” Kico nan tabata describiendo? E foyeto di 32 página titulá Un Buki pa Tur Hende, cu Sociedad Watch Tower a presentá n’e Congresonan di Distrito “Fe den e Palabra di Dios” tené durante 1997/98.

E foyeto aki a ser prepará cu un público particular na mente—esnan cu kisas tin un bon educacion, pero cu sa masha poco tocante Bijbel. Hopi dje personanan ei tin opinionnan concreto tocante Bijbel, aunke nan nunca a les’é personalmente. E propósito dje foyeto ta pa convencé e lector cu, por lo ménos, Bijbel ta merecé un examinacion. E foyeto no ta obligá e lector pa aceptá e punto di bista cu ta Dios a inspirá Bijbel. Mas bien, e ta laga e echonan papia pa nan mes. E no ta usa palabranan sofisticá, pero e ta papia cla i directo.

Manera e comentarionan mencioná ariba ta indicá, esnan presente n’e congresonan tabata ansioso pa usa e foyeto aki den nan sirbishi di veld. Por ehempel, na Francia nan a organisá un campaña special di testificacion pa dianan 23 i 24 di augustus ora cientos di miles di bishitante hóben for di rond mundu a reuní na Paris pa Dia Mundial di Hubentud. Rond di 2.500 Testigo (mayoria di nan entre 16 pa 30 aña di edad) a laga 18.000 ehemplar dje foyeto na aleman, frances, ingles, italiano, polaco i spañó.

Laga nos haci tur nos esfuerso pa usa e foyeto aki, Un Buki pa Tur Hende, den nos ministerio. Laga e publicacion aki resultá di ta balioso den convencé hende razonabel cu nan mester examiná Bijbel pa nan mes.