Pakico Nan Ta Hacie?

TUR aña Testigonan di Jehova rond mundu ta reuní na cantidad di miles na congresonan. Ei, nan ta disfrutá di compañerismo i ta scucha un excelente programa di instruccion bíblico. Algun ta haci hopi esfuerso pa asistí n’e congresonan aki. Por ehempel, aña pasá, na Malawi un pareha den nan 60 i picu, huntu cu nan yu homber i su casá i baby, a biaha 80 kilometer riba baiskel pa asistí na un congreso. Nan a sali nan pueblo seis or di mainta i a yega n’e sitio di congreso 15 ora despues.

Na Mozambique, un grupo a biaha tres dia riba baiskel pa yega na un congreso. Un anochi, ora nan tabata kampeer na aire liber, nan a tende gruñamentu di leon masha cerca. Aunke nan a tira carbon den direccion dje animalnan, e leonnan a keda ei banda te ora di dia a habri. Un otro Testigo cu tabata bayendo e mésun congreso a topa cara-cara cu un leon riba caminda. El a para ketu sin move te ora e leon a bai djei. N’e congreso e Testigonan aki a conta alegremente con nan a ser “librá for di boca di leon.”—2 Timoteo 4:17.

Hopi Testigo di Jehova ta haci masha esfuerso pa asistí na congreso of asta reunionnan semanal di congregacion pa adoracion. Pakico? E siguiente artículonan lo yudá bo comprendé pakico reunimentu huntu ta asina importante.