Dios Lo Destruí Mundu?

SEGUN Papa Juan Pablo II, hende por mira futuro cu confiansa. El a declará cu atrabes di historia, “hende a sigui cometé picá, tal bes asta mas grandi cu esnan describí promé cu e diluvio.” Tog, e papa a splica: “For dje palabranan dje pacto cu Dios a cera cu Noe nos ta realisá cu awor no tin picá cu por pone Dios destruí e mundu cu e mes a crea.”

Ta berdad cu Dios hamas lo destruí mundu? Bijbel ta declará cu despues di Diluvio, Dios a bisa Noe: “Nunca mas tur carni lo ser cortá dor di awanan di un diluvio, i nunca mas lo sosodé un diluvio pa ruiná e tera.” (Génesis 9:11) E papa ta bisa cu, cu e palabranan aki, Dios a “obligá su mes pa conserbá [e tera] for di destruccion.”

Bijbel ta mustra claramente cu e Creador lo no permití pa nos planeta ser destruí. Bijbel ta bisa: “E tera ta permanecé asta pa tempu indefiní.” (Eclesiástes 1:4) Pero tin mas cos cu nos ta siña for dje Diluvio—algu cu e papa no a comentá ariba.

Jesus a bisa cu condicionnan riba tera n’e tempu di su futuro presencia lo ta “mescos cu e dianan di Noe tabata,” ora hende “no a haci caso te cu e diluvio a bini i a bari nan tur.” (Mateo 24:37-39) Di manera similar, apostel Pedro a skirbi cu mescos cu “e mundu dje tempu ei a sufri destruccion ora el a ser inundá cu awa,” asina tambe “e dia di huicio i di destruccion di hende malbado” ta menasá e mundu actual.—2 Pedro 3:5-7.

Jesus i Pedro a lubidá riba e pacto cu Dios a cera cu Noe? Di ningun manera! Net manera Dios a declará den e pacto cu Noe, lo e no usa awanan di diluvio pa trece un fin n’e mal sistema di cosnan aki. Mas bien, lo e usa e poder dje “Rey di reynan i Señor di señornan,” Jesucristo. (Revelacion [Apocalípsis] 19:11-21) P’esei, segun Bijbel, e tera lo no ser destruí, pero e “mundu” di humanidad malbado sin falta lo yega na su fin. (Proverbionan 2:21, 22; Revelacion 11:18) Despues di esei, “e hustunan mes lo poseé e tera, i nan lo biba pa semper riba dje.”—Salmo 37:29.