Nan Ta Alabá Nan Creador Silenciosamente

NORMALMENTE bahadanan di solo ta espectacular. Pero e bista di solo bahando tras dje ceru en particular aki den Alpen Apuane di Toscana, Italia, ta berdaderamente único.

Mirá for di un distancia, ta parce cu solo ta drenta den e ceru en bes di baha su tras. Di con? Pasobra e punta dje ceru tin un boog natural cu ta parce como si fuera ta cu beitel nan a cob’é. En berdad, e ceru aki ta merecé su nomber, Monte Forato—Ceru Borá. Debí cu tera ta drei rond di solo, dos bes pa aña so esnan cu wak dor dje boog por mira con ta parce como si fuera solo ta drenta den Monte Forato.

Mescos cu otro rasgonan di creacion, shelu inanimá ta alabá su Creador. Con? Den e mésun manera cu un bunita cuadro por trece alabansa n’e artista cu a pint’é. En efecto, cuerponan celestial ta papia di Jehova su poder, sabiduria i mahestad. Manera e salmista a formul’é: “Shelunan ta declarando e gloria di Dios; i dje obra di su mannan e expansion ta informando.” (Salmo 19:1; 69:34) Siendo cu solo i otro cuerponan inanimá ta alabá nan Creador, cuantu mas nos mester haci esei!—Salmo 148:1, 3, 12, 13.