Bo Ta Corda?

Bo a apreciá di por a lesa e edicionnan recien di E Toren di Vigilancia? Wel, wak si bo por contestá e siguiente preguntanan:

◻ Kico ta e propósito principal di educacion pa un hóben cristian?

E propósito principal di educacion mester ta pa ekipá un hóben p’e ta un minister eficas di Jehova. I e educacion mas importante pa logra esei ta un educacion spiritual.—15/8, página 21.

◻ Kico ta e motibunan pa informá malecho serio di un compañero cristian n’e ancianonan?

Un motibu pa informá malecho serio ta cu e ta sirbi pa conserbá e limpiesa dje congregacion. Un otro motibu ta cu esei ta un acto di amor cristian basá riba principio mustrá na Dios, na e congregacion i na e malechor.—15/8, página 28, 30.

◻ Kico ta nificá tene “e dia di Jehova masha presente”? (2 Pedro 3:12)

Esaki ta nificá cu nos no ta posponé “e dia di Jehova” den nos mente. Nos no mester lubidá cu e dia pa Jehova destruí e sistema di cosnan aki ta cerca. E mester ta asina real pa nos cu nos ta mir’é claramente, como algu net nos dilanti. (Sofonías 1:7, 14)—1/9, página 19.

◻ Pakico e último dianan dje sistema malbado aki a continuá mas tantu tempu cu hopi hende a spera?

Jehova ta tuma na consideracion loke ta den e mihó interes di henter humanidad. Su preocupacion ta bida di hende. (Ezekiel 33:11) Nos por ta sigur cu e fin lo yega net na tempu pa cumpli cu e propósito di nos amoroso Creador cu tin tur sabiduria.—1/9, página 22.

◻ Con esnan den sirbishi di tempu completo por mantené nan goso apesar di problemanan cu nan por confrontá?

Nan mester refleccioná riba e hopi bendicionnan cu nan tin i reconocé cu miles di otro hende ta pasa hopi mas trabou. (1 Pedro 5:6-9)—15/9, página 24.

◻ Kico tabata William Tyndale su meta pa traducí e Bijbel?

Tyndale su meta tabata pa laga e Scritura papia cu e hende comun den términonan mas exacto i simpel posibel.—15/9, página 27.

◻ Con nos por mustra cu nos ta defensornan leal dje Palabra di Dios?

Nos ta mustra nos lealtad n’e Palabra di Dios dor di predik’é celosamente na otronan. Como maestro, nos mester usa Bijbel cuidadosamente i nunca troc’é of amplia loke e ta bisa pa cuadra cu nos ideanan. (2 Timoteo 2:15)—1/10, página 20.

◻ Con e spiritu venenoso di mundu por debilitá nos integridad?

E spiritu di mundu por debilitá nos integridad dor di haci nos insatisfecho cu loke nos tin, i haci nos ansioso pa pone nos mes necesidad i interesnan dilanti esnan di Dios. (Compará cu Mateo 16:21-23.)—1/10, página 29.

◻ Kico kier men sirbi Jehova di henter alma?

E “alma” ta referí na henter e persona, cu tur su abilidadnan físico i mental. Sirbi Jehova di henter alma ta nificá duna di nos mes, usando tur nos facultadnan i usa nos energia n’e grado mas completo posibel den sirbishi di Dios. (Marco 12:29, 30)—15/10, página 13.

◻ Kico ta e clave pa ta un persona di principio divino?

E clave realmente ta pa conocé Jehova, loke ta agrad’é, loke ta desagrad’é, i su propósitonan. Ora e principionan aki relacioná cu Dios ta dirigí nos bida, nan ta bira, en efecto, principionan bibu. (Jeremías 22:16; Hebreonan 4:12)—15/10, página 29.

◻ Ki punto di bista balansá sirbidónan di Jehova tin pa cu gobernacion humano?

Nan ta neutral den asuntunan político siendo cu nan ta sirbi como embahador dje Reino di Dios. (2 Corintionan 5:20) Di otro banda, pa motibu di nan concenshi nan ta sumiso na esnan cu ta den puesto di autoridad.—1/11, página 17.

◻ Ki les nos por siña for dje rumbo cu Eliseo e profeta a tuma?

Ora el a ricibí e invitacion pa compañá Elías den sirbishi special, Eliseo a bandoná su cunucu inmediatamente pa sirbi Elías, maske algun di su tareanan lo tabata humilde. (2 Reynan 3:11) Awe algun minister di Dios a desplegá un spiritu similar di sacrificio propio dor di bandoná nan trabou seglar pa bai predicá e bon nobo den teritorionan leu.—1/11, página 31.

◻ Ki conseho beneficioso e carta di Santiago ta contené?

E ta mustra nos con pa enfrentá prueba, ta consehá nos pa no mustra faboritismo i ta urgi nos pa participá den obranan recto. Santiago ta urgi nos pa controlá e lenga, pa resistí influencia mundano i pa promové pas. Tambe su palabranan por yuda nos mustra pacenshi i haci oracion.—15/11, página 24.

◻ Pakico Jehova ta “cla pa pordoná”? (Salmo 86:5)

Jehova ta cla pa pordoná, pasobra e no ta lubidá cu nos ta criaturanan di stof, cu tin limitacion of debilidadnan, como resultado di imperfeccion. (Salmo 103:12-14)—1/12, página 10, 11.

◻ Pakico nos mester ta dispuesto pa pordoná otronan?

Si nos nenga di pordoná otronan, ora tin base pa mustra misericordia, esei por afectá nos propio relacion cu Dios desfaborablemente. (Mateo 6:14, 15)—1/12, página 17.