Dorná cu un Renchi’ Orea di Oro

FOR di tempu di mas promé, hoyanan di oro ta ser apreciá mashá pa nan balor i bunitesa. Ora Josef a bira promé minister di Egipto, el a ricibí un cadena di oro cerca fárao. (Génesis 41:42) Rebeca a haña un renchi’ nanishi di oro i dos armband di oro, cu lo a bal mas of ménos 2.500 florin awe. (Génesis 24:22) Indudablemente e regalonan precioso aki a ser aceptá cu gratitud i bistí cu placer.

Bijbel ta papia di hoyanan figurativo cu ta bal mas cu esnan cu Josef i Rebeca a bisti. Proverbionan 25:12 ta declará: “Un renchi’ orea di oro, i un adorno di oro special, asina ta un censuradó sabí pa e orea cu ta tende.” Ora un consehero duna conseho basá riba e Palabra di Dios en bes di su mes opinion, e di berdad ta dunando un regalo balioso. Pakico? Pasobra e conseho ei al final ta bini di Jehova mes. Bijbel ta bisa nos: “E disiplina di Jehova, O mi yu, no rechasá; i no aborecé su reprendementu, pasobra Jehova ta reprendé esun cu e ta stima, mescos cu un tata ta haci cu un yu den ken e tin placer.” (Proverbionan 3:11, 12) Ora e scuchadó aceptá i aplicá e conseho humildemente, ta como si fuera e ta dornando su mes cu un renchi’ orea di oro. Ta net manera e proverbio bíblico inspirá ta bisa: “Felis ta e homber cu a haña sabiduria, i e homber cu ta obtené dicernimentu, pasobra teniend’e como ganashi ta mihó cu teniendo plata como ganashi i teniend’e como producto, mas cu oro mes.”—Proverbionan 3:13, 14.