E Dies Mandamentu

OBISPU di Gloucester, Inglatera, a descubrí cu mas cu mitar dje miembronan di clero den su obispado no por a ripití e Dies Mandamentu, i 10 porciento di nan no tabata sa unda pa haña nan den Bijbel. Pero esei tabata 450 aña pasá. E situacion a mehorá desde e tempu ei? Apénas. Un encuesta recien cu Sunday Times a haci basá riba un ‘steekproef’ di clero anglicano a revelá esei.

Dje 200 miembronan di clero cu nan a entrevistá, solamente 34 porciento por a cita tur Dies Mandamentu. Entre e otronan, unu a haña cu nan tabatin muchu prohibicion, i un otro a descartá nan como irelevante pa problemanan moral djawendia.

Abo sa e Dies Mandamentu of unda pa haña nan? Nan ta registrá na Exodo, e di dos buki di Bijbel, capítulo 20, e promé 17 versículonan. Pakico no lesa nan? Aki ta sigui un manera simpel pa agrupá nan. E promé cuaternan ta relacioná cu nos adoracion na Dios, e di cincu ta resaltá bida di famia, number seis te cu nuebe tin di haber cu nos relacion cu nos próhimo, i e di dies ta único, e ta pone nos examiná nos propio curason, pa controlá nos motibunan. Ata aki un resúmen breve con cristiannan por aplicá e principionan aki.

Promé: Duna nos Creador debocion exclusivo. Di dos: No usa imágen den adoracion. Di tres: Semper respetá i dignificá e nomber di Dios. Di cuater: Apartá tempu pa concentrá riba asuntunan spiritual, sin distraicion. Di cincu: Yunan, respetá boso mayornan. Di seis: No mata. Di shete: Evitá adulterio. Di ocho: No horta. Di nuebe: Papia berdad. Di dies: Evitá cudishi.

E Dies Mandamentu tabata parti di e código di ley duná na Moises. Pero e principionan cu nan ta contené ta eterno. (Romanonan 6:14; Colosensenan 2:13, 14) P’e motibu aki, siguidónan di Jesus a cita for dje Dies Mandamentu i a referí na nan. (Romanonan 13:8-10) Cuantu mas felis—i sigur—bida lo ta awe si tur hende respetá i biba segun e principionan aki inspirá pa Dios!