Informe di Proclamadonan di Reino

Hóbennan Ta Alabá Dios den e República Democrático di Congo

SIGLONAN pasá, e salmista a invitá hóbennan calurosamente pa uni den alabá e Rey di eternidad: “Boso, hóbennan i tambe boso, bírgennan, boso, bieunan huntu cu hobencitonan . . . , alabá e nomber di Jehova, pasobra su nomber so ta inalcansablemente haltu.” (Salmo 148:12, 13) E siguiente experencianan for di e República Democrático di Congo ta resaltá e privilegio incomparabel aki.

• E doño di cas di un pionero special tabata impresioná cu e conducta di Testigonan di Jehova. P’esei el a permití e Testigonan studia Bijbel cu su yu muher di cincu aña, Fifi. Despues di observá Fifi su progreso studiando Mi buki di relato bíblico,a su tata a permitié asistí n’e reunionnan na Salon di Reino. Ei, Fifi a siña canticanan di Reino for dje buki di cantica di Testigonan. El a gusta foral cantica number 4, titulá “Dios Su Promesa di Paradijs.”

Un dia Fifi su tata a dicidí di bai su misa cu Fifi. Pa tur hende su sospresa, Fifi a nenga di canta e canticanan di misa. Di con? Pasobra el a haña cu e canticanan cu nan a canta den misa di su tata no tabata na armonia cu loke el a siña for di su studio di Bijbel. Na lugá di eseinan, cu curashi el a canta su cantica di Reino preferí.

Despues di a purba vários biaha sin éxito pa cambi’é di opinion, e lidernan di iglesia a dicidí di excomunicá Fifi di cincu aña! Apesar dje mal trato aki, su tata a keda calmu. E tabata orguyoso cu Fifi a tuma un posicion firme pa loke e tabata kere. Tantu Fifi su tata como su mama kier p’e sigui asociá cu Testigonan di Jehova.

• Ora un mucha homber tiener cu yama Lukodi a dicidí di studia Bijbel cu Testigonan di Jehova, su tata tabata masha contra. Na un ocasion ora Lukodi tabata prepará pa bai reunion na Salon di Reino, su tata a menas’é cu un machete. Na un otro ocasion, Lukodi su tata a dal e cu un palu, causando un cortá hundu den su lomba. Apesar dje oposicion intenso, Lukodi a keda firmemente dicididu di bira un Testigo di Jehova. El a sigui haci progreso i a ser bautisá. Awor e ta sirbi como pionero regular.

Sona, Lukodi su ruman muher mas chikitu, a keda asina impresioná cu e posicion cu su ruman homber a tuma, cu e tambe a cuminsá studia Bijbel cu Testigonan di Jehova. Sin embargo, pa strob’é di studia, nan tata a manda Sona scol den un otro pueblito, caminda no tabatin Testigo. No obstante, Sona a hacié un custumber pa papia cu otronan tocante e cosnan cu el a siña. Como resultado, su prima tambe a bira interesá.

Ora Testigonan di un pueblito bisiña a tende tocante Sona su actividad di predicá, nan a bai bishit’é i a haci areglo pa e haña studio di Bijbel regular na cas. El a sigui haci progreso i pronto el a djoin su ruman homber como un Testigo di Jehova dedicá i bautisá. Ademas, awor su prima ta un publicadó no-bautisá, i un studio di buki ta ser conducí den e pueblito aki.

Ta ki maraviyoso i refrescante ora hóbennan ta uni den alabá e nomber di Jehova!

[Nota]