Anochinan sin Por Drumi Cu Tabata Beneficioso

ASTA reynan ta pasa anochinan sin por drumi. Un gobernante poderoso di Persia den siglo cincu P.E.C., Asuero, a experenciá un di nan. Tal bes pensando cu el a neglishá un of otro deber, el a laga nan lesa e registronan real p’e. El a haña sa cu un sirbidó fiel, Mardokeo, a frustra un complot di asesinato, pero no a ser recompensá. Asuero a dicidí di corigí e descuido aki inmediatamente. E efectonan beneficioso di su accionnan pa cu e pueblo di Dios ta indicá cu ta Dios a causa e insomnio dje rey.—Ester 6:1-10.

E congregacion di Testigonan di Jehova den e pueblo di Hermanus na costa di Sur Africa tin bon motibu pa corda e parti aki di Bijbel. Nan tabata reuní den un sala di huur. Pa hopi aña nan a trata na cumpra tereno pa construí nan propio Salon di Reino. Cu tempu, na 1991, e Concilio di Pueblo a ofrecé nan un sitio ideal.

Sin embargo, algun hende no tabata kier pa bende e sitio aki cu Testigonan di Jehova. Despues di un tardansa di vários luna, autoridadnan a informá e congregacion cu nan a pone un moratorio di tres aña riba benta di propiedad cu iglesianan, i e oferta dje tereno a ser halá aden. Na mei 1993 e congregacion a skirbi atrobe, pidiendo e concilio pa reconsiderá nan decision. Nan a ricibí un carta di un solo frase como contesta, declarando cu e moratorio tabata na vigor ainda.

Na october dje aña ei, un dje consehalnan dje pueblo tabatin un anochi sin por drumi. El a pasa e tempu ta blader dor di nótulonan bieu dje concilio pa mira si cualkier asuntu tabatin mester di atencion. E carta cu e Testigonan a skirbi pa pidi e concilio reconsiderá su decision a capta su atencion. P’esei el a dicidí di pone e asuntu riba agenda di nan siguiente reunion. E tabata kier a mustra cu e Testigonan di Jehova a aplicá p’e tereno promé cu e moratorio a ser poné riba propiedad pa iglesianan.

Na su debido tempu nan a asigná e congregacion e mésun tereno cu originalmente nan a ser ofrecé na 1991! E ta riba e caminda principal, fácilmente accesibel pa miembronan dje congregacion i esnan interesá. Nan a construí un bunita Salon di Reino, cu a ser dedicá na Jehova dia 5 di october, 1996.

Aunke e congregacion ta lamentá e incumbinencia dje consehal di a keda un anochi sin por drumi, e por ser consolá p’e echo cu asta Rey Asuero tabatin unu. I e resultado den ámbos caso tabata beneficioso. E congregacion na Hermanus ta masha gradicidu mes di por tin nan propio Salon di Reino, un centro pa adoracion puru i entrenamentu teocrático den e pueblo popular aki na costa.—Hebreonan 10:24, 25.