Sacando “Awa Profundo”

UN PROVERBIO bíblico ta declará: “Conseho den curason di un homber ta manera awa profundo, pero e homber di dicernimentu ta esun cu lo sak’é.” (Proverbionan 20:5) Den tempunan bíblico tabata hopi mas difícil pa saca awa cu den hopi pais awe. Ora Jesus a papia cu e muher samaritano, e tabata saca awa for dje fuente di Jacob, un pos cu tabata 23 meter hundu!—Juan 4:5-15.

Manera Proverbionan 20:5 ta indicá, e dicernimentu necesario pa saca e pensamentu i sintimentunan profundo scondí den curason di un persona ta masha parecido n’e esfuerso necesario pa saca awa for di un pos. Esaki ta e caso den mayoria asuntu di bida. Por ehempel, probablemente bo conocé individuonan cu durante hopi aña a acumulá un rikesa di conocimentu i experencia. Si e personanan aki no ta incliná pa duna conseho di nan mes sin cu nan ser pidí, lo bo tin cu saca esei for di nan. Dor di mustra interes, haci pregunta i sondea cu tacto, lo bo laga bo hember baha den un pos profundo di sabiduria, na moda di papia.

E conseho di Proverbionan 20:5 ta aplicabel den famia tambe. Hopi biaha, bo por tende esposanan bisa: “Mi casá no ta bisá mi con e ta sinti!” Un esposo kisas ta bisa: “Mi casá ta djis stop di papia cu mi!” Den situacionnan asina, dicernimentu ta necesario pa saca e pensamentunan cu ta profundo den curason di un casá. Preguntanan cu tacto (Bo tabatin un dia pisá awe? Kico a sosodé? Cu kico mi por yuda?) hopi biaha ta iniciá comunicacion di curason pa curason. Dor di mustra un dicernimentu asina nan lo fortalecé e laso matrimonial, p’e beneficio di tantu e esposo como e esposa.