Ta Posibel Ainda pa Lanta Yunan cu Bon Moral?

“NOS ta biba actualmente den un sociedad masha complicá, un cultura masha heterogéneo, caminda no tin un código uniforme di moralidad,” segun Robert Glossop dje Instituto Vanier pa Famia na Ottawa, Cánada. Cu ki resultado? Un reportahe den e korant The Toronto Star ta bisa: “Embaraso di tiener, violencia hubenil i suicidio di tiener tur ta aumentando.”

E problema ta extendé mas aleu cu Nort América. Bill Damon, director dje Centro pa Desaroyo Humano na Universidad Brown na Rhode Island, Merca, a studia e problemanan aki na Gran Bretania i otro nacionnan europeo, i tambe na Australia, Israel i Hapon. E ta señalá cu iglesia, scol i otro institutonan no ta duna guia na hóbennan. E ta kere cu nos cultura “a perde contacto cu loke yunan tin mester pa forma nan personalidad i bira competente.” Citando expertonan den e ramo di cria yu i cu ta siña cu “disiplina ta dañino pa salú i bienestar di yu,” Damon ta opiná cu esaki ta “un recept pa lanta yu desobediente i cu kièr.”

Kico e hóbennan djawe tin mester? Constantemente nan tin mester di entrenamentu amoroso cu ta corigí mente i curason. Hóbennan cu ta diferente for di otro ta rekerí diferente clase di disiplina. Hopi biaha por duna disiplina amoroso dor di razoná cu e mucha. P’e motibu ei Proverbionan 8:33 ta bisa nos pa ‘scucha na disiplina.’ Sin embargo, algun ‘no ta ser corigí cu simpel palabra.’ Pa nan, e castigu apropiado pa desobedencia, duná n’e midí corecto, por ta necesario. (Proverbionan 17:10; 23:13, 14; 29:19) Ora Bijbel ta duna e recomendacion aki, e no ta hustificá pa duna sota cu rabia ni bati severamente, loke por blousa of heridá un yu. (Proverbionan 16:32) Mas bien, un yu mester comprendé pakico e ta ser corigí i sinti cu su mayor ta haci esei pasobra e ta berdaderamente interesá den su bienestar.—Compará cu Hebreonan 12:6, 11.

E buki E Secreto pa Felicidad den Famia ta resaltá tal conseho bíblico práctico i sano.