Mustrando Amor na Esnan den Necesidad
CRISTIANNAN tin tantu e obligacion como e privilegio di mustra amor na nan rumannan den necesidad. (1 Juan 3:17, 18) Apostel Pablo a skirbi: “Laga nos obra loke ta bon pa cu tur, pero specialmente pa cu esnan relacioná cu nos den e fe.” (Galationan 6:10) Un ruman cu a sirbi Jehova pa casi cuater década, recientemente a experenciá e amor dje hermandad cristian durante e malesa i despues morto di su esposa. E ta skirbi:
“Siendo cu mi tabata cuida mi casá na cas durante su malesa, mi no por a traha seglarmente pa casi dos luna. Tabata ki un alivio ora e rumannan den e congregacion a yuda nos di buena gana! Nos a ricibí hopi regalo den forma di placa—‘pa yuda cu e gastunan adicional,’ manera e tarhetanan acompañante tabata bisa—cu cua nos a paga hipotek, awa, lus, telefon i otro gastunan.
Dos siman promé cu mi esposa a muri, nos superintendente di circuito a haci nos un bishita animador. Asta el a pasa e slidenan cu e congregacion lo a mira na fin di siman. Nos por a scucha e reunionnan via telefon—incluyendo e reunionnan pa sirbishi di veld cu e superintendente di circuito tabata conducí. Na un dje reunionnan aki, el a laga tur esnan presente pa sirbishi di veld saludá mi esposa den coro. Di manera cu aunke e tabata físicamente isolá, nunca el a sintié su so.
Dentro di un ora despues cu el a muri, casi tur e ancianonan tabata na mi cas. E dia ei so mas cu shen ruman a pasa cas bishitá mi. Cuminda a aparecé ‘milagrosamente’ riba mesa pa tur presente. Mi no por cuminsá conta tur e regalonan, expresionnan di condolencia, palabranan di consuelo i oracionnan cu a ser hací na fabor di mi. Ki fortalecedor nan tabata! Finalmente mi tabatin cu pidi e rumannan pa stop di trece cuminda i yuda limpia cas!
Unda otro cu no ta den e organisacion di Jehova nos por haña expresionnan inegoista asina di compasion, interes i amor? Awe mayoria hende por conta riba un man e cantidad di berdadero amigu cu nan tin. Jehova a bendicioná nos cu un famia masha grandi di rumannan spiritual!”—Marco 10:29, 30.