Riba Ken Su Promesanan Bo Por Depende?
NA 1893 un grupo di 74 experto riba asuntunan social a reuní na e Expo Mundial di Chicago, pa papia tocante futuro. (E plachi ariba ta mustra e sitio.) Mirando 100 aña padilanti na aña 1993, entre otro cosnan nan a predicí lo siguiente: “Hopi hende lo biba te cu 150 aña.” “Prizonnan lo bira ménos i lo bai considerá divorcio innecesario.” “Gobiernu lo a bira mas simpel, como cu berdadero grandesa di un nacion semper ta incliná na simplesa.”
Mescos tambe na 1967, un buki titulá The Year 2000 [Aña 2000] a predicí: “Pa aña 2000, computernan probablemente ta igualá, simulá of surpasá algun di hende su abilidadnan intelectual di mas ‘humano,’ incluyendo kisas algun di su capacidadnan creativo i estético.” “E idea cu lo tin robotnan na prijs moderá haciendo mayor parti di trabou di cas . . . ta parce masha razonabel pa aña 2000.”
Humanidad su inabilidad di premirá sucesonan futuro ta na contraste skerpi cu Dios su abilidad. Por ehempel, compará e prediccionnan mencioná anteriormente cu loke Bijbel a pronosticá casi 20 siglo pasá relacioná cu nos tempu: “Hende lo ta stimadó di nan mes, stimadó di placa, presumido, halsá, blasfemadó, desobediente na mayornan, malagradecí, desleal, sin cariño natural, no dispuesto na ningun acuerdo, calumniadó, sin dominio propio, feros, sin amor pa bondad, traicionero, cabesura, hinchá cu orguyo, stimadó di placer mas bien cu stimadó di Dios, teniendo un forma di debocion piadoso pero resultando falsu na su poder.”—2 Timoteo 3:1-5.
E profecia aki di Bijbel relacioná cu “e último dianan” ta djis unu di hopi cu a cumpli den nos dia. E Palabra di Dios a pronosticá cu “e señal” di Jesus su presencia lo a incluí guera mundial, scarcedad di cuminda, pest, temblor i e predicacion mundial dje bon nobo dje Reino di Dios.—Mateo 24:3-14; Lucas 21:11.
E exactitud infalibel dje promesanan di Dios a impulsá un escritor di Bijbel na declará siglonan pasá: “Ni un solo palabra di tur e bon palabranan cu Jehova boso Dios a papia cu boso a faya. Nan tur a ser realisá pa boso. Ni un solo palabra di nan a faya.”—Hosué 23:14.
Sí, nos por ta sigur cu tur Dios su promesanan pronto lo realisá. E Reino di Dios lo trece un fin na enfermedad, crímen, adiccion na droga, hamber i guera—henter e tera lo ta un paradijs. (Salmo 37:10, 11, 29; Revelacion 21:3, 4) Bo por stèns riba cumplimentu dje profecia aki! E ta bini di nos Creador, “kende no por gaña.”—Tito 1:2; compará cu Hebreonan 6:13-19.
[Rekonosementu pa Potrèt na página 32]
Cleveland State University Archive