Nan A Para Firme Meimei di Persecucion Nazi

E INTEGRIDAD intrépido di Testigonan di Jehova na Alemania nazi ta para na contraste skerpi cu e posicion cu iglesianan di cristiandad a tuma. Esaki ta loke profesor di historia John Weiss a comentá den su buki Ideology of Death (Ideologia di Morto). E ta skirbi:

“Na 1934 iglesia evangélico a insistí cu ‘luteranonan mester yama e nazinan bon biní,’ i a gradicí ‘e Señor Dios’ pa a duna e alemannan un ‘hefe supremo piadoso i confiabel.’ . . . Un obispu protestant a skirbi su clero, ‘Dios a manda [Hitler] pa nos.’” Weiss ta continuá: “Iglesia metodista aleman . . . tabata eens cu Obispu Dibelius di cu Hitler a salba Alemania for di un inminente revolucion bolshevik, treciendo pas i stabilidad . . . Iglesia mormon a consehá su fielnan, cu oponé Hitler a nificá un violacion di ley mormon.” I e ta agregá: “A bisa católiconan cu tabata un deber sagrado pa obedecé e estado nobo, un deber cu nunca a ser retirá ni despues cu tur e horornan na Oost Europa a bira conocí p’e clero.”

Pero kico di Testigonan di Jehova? Profesor Weiss ta mustra cu “como grupo, solamente e Testigonan di Jehova a resistí e nazinan.” Miles di nan a ser encarcelá, profesor Weiss ta continuá, “tog cualkier Testigo cu a ser mandá na un campo di concentracion por a ser poné den libertad simplemente dor di firma un papel den cua e ta renunciá su fe.”

Relacioná cu e integridad di Testigonan di Jehova, profesor Weiss ta comentá: “Nan ehempel ta ilustrá e determinacion único i poder heróico cu cristianismo di promé tabatin promé cu el a bira un institucion establecí i su comprometementu cu e órden social a aplastá e deseo di hiba un bida di integridad. Manera un pastor protestant a skirbi di nan: ‘No e iglesianan ampliamente reconocí, sino e hendenan calumniá i despreciá aki tabata esnan cu a para promé contra e furia di Hitler, i cu a tribi bai den oposicion di acuerdo cu nan fe.’”