Corte Supremo di Connecticut Ta Confirmá Derechonan di Pashent

Dia 16 di april, 1996, e Corte Supremo di Connecticut, Merca, a confirmá e derecho di Testigonan di Jehova pa nenga transfusion di sanger. E decision aki a revocá un sentencia anterior di corte den promé instancia.

Na augustus 1994, Nelly Vega, un Testigo di Jehova, a cuminsá sangra profusamente despues cu el a duna lus na su promé yu. Esfuersonan pa stop e hemoragia a resultá en bano. Ya cu Sra. Vega su condicion a empeorá, hospital a trata na obtené un órden di corte cu ta autorisá un transfusion di sanger. Sra. Vega a firma caba un documento cu ta exonerá e dokternan i e hospital di cualkier responsabilidad pa e consecuencianan di su decision pa no dun’é sanger ni derivadonan di sanger durante su estadia den hospital. No obstante, hospital a razoná cu dor di forsa un transfusion di sanger nan lo a actua den e mihó interes dje baby recien nací, cu, segun hospital, tabatin mester di su mama. Corte den promé instancia tabata preocupá tambe cu, aparte di su perdementu di sanger, Sra. Vega tabata un muher yong i saludabel. Pues, apesar di protesta di tantu e esposo di Sra. Vega como su abogado, corte a emití e órden i hospital a duna transfusion.

Cu tempu, e caso a ser hibá Corte Supremo di Connecticut. Ei, corte a tuma e decision unánime cu e accion di hospital a violá Sra. Vega su derechonan. E sentencia a declará: “E audiencia dilanti e corte di promé instancia a tuma lugá meianochi, bou di condicionnan extremo di emergencia cu no a permití ningun dje dos partidonan desaroyá nan argumentonan plenamente.”

E sentencia aki di Corte Supremo di Connecticut ta significativo pa hende cu no ta Testigo di Jehova. “E ta importante pa tur pashent cu kisas no ta di acuerdo cu e decisionnan di nan dokter,” Donald T. Ridley, abogado di Sra. Vega, ta bisa. “E sentencia lo prevení hospitalnan di pasa sin mas riba e pashent su balornan, sea religioso of seglar.”